जर्मनी र रोमानियाले नेपाली कामदार लैजाने, श्रम सम्झौता गर्न मन्त्रिपरिषदबाट स्वीकृति
काठमाडौं । युरोपेली मुलुक जर्मनी र रोमानियाले अब नेपाली कामदार लैजाने बाटो खुल्ने भएको छ । जर्मनी र रोमानियासँग द्विपक्षीय श्रम सम्झौता गर्न श्रम, रोजगार तथा सामाजिक सुरक्षा मन्त्रालयलाई स्वीकृति दिएसँगै नेपाली कामदार युरोप छिर्ने वैधानिक बाटो खुला हुन लागेको हो ।
मङ्गलबार बसेको मन्त्रिपरिषद् बैठकले ती दुई मुलुकसँग श्रम सम्झौता गर्न स्वीकृति दिने र त्यससम्बन्धी कार्यक्रममा सहभागी हुन श्रममन्त्री शरत्सिंह भण्डारी नेतृत्वको प्रतिनिधिमण्डललाई अनुमति समेत प्रदान गरेको छ ।
विभागीय श्रम, रोजगार तथा सामाजिक सुरक्षा मन्त्रालयले अन्य मुलुकमा समेत नेपाली श्रमिक पठाउन श्रम सम्झौताका लागि पहल गरिरहेको छ । यस्तै, सरकारले नेपाल र स्विजरल्यान्ड तथा नेपाल र रुवाण्डाबीच द्विपक्षीय वार्ता तथा हवाई सेवा सम्झौता गर्न पनि स्वीकृति दिएको छ ।
बैठकले नेपाल र मलेसिया सरकारका परराष्ट्र मन्त्रालयबीच द्विपक्षीय परामर्श संयन्त्र स्थापना गर्ने निर्णयसमेत गरेको छ । मन्त्रिपरिषद्ले सिटी अफलन्डनको मेन्सन हाउसमा आयोजना हुने उच्चस्तरीय लगानी सम्मेलनमा सहभागी हुन अर्थमन्त्री डा. प्रकाशशरण महत नेतृत्वको प्रतिनिधिमण्डललाई स्वीकृति दिएको छ।
