बीमा प्राधिकरणका अध्यक्ष सूर्य प्रसाद सिलवाल क्यानाडा उड्दै
काठमाडौं । नेपाल बीमा प्राधिकरणका अध्यक्ष सूर्य प्रसाद सिलवाल आज साँझ क्यानाडा उड्दैछन् । सम्पत्ति शुद्धिकरण सम्बन्धी कार्यक्रममा क्यानाडामा हुन लागेको सम्मेलनमा भाग लिन उनी आज साँझ क्यानाडा उड्न लागेका हुन् ।
अख्तियार दुरुपयोग अनुसन्धान आयोगका सचिव रामेश्वर दंगाल, नेपाल राष्ट्र बैंकका गभर्नर महाप्रसाद अधिकारी, अर्थमन्त्रालय र प्रधानमन्त्री कार्यालयका प्रतिनिधिसँगै प्राधिकरणका अध्यक्ष सिलवाल क्यानाडा जान लागेका हुन् ।
अध्यक्ष सिलवालले आज विहान बोर्ड बैठक राखेर दिउँसो विदा हुन लागेका हुन् । अध्यक्ष सिलवाल विदेश गएपछि प्राधिकरणको कामु अध्यक्ष कसलाई दिने भन्ने एकिन भइसकेको छैन । सरकारी प्रतिनिधि मण्डलसहितको सो टोली असारको अन्तिममा मात्रै स्वदेश फर्कनेछ ।
