सर्भर समस्याको कारण देशैभरका स्वास्थ्य बीमा सेवा अवरुद्ध, सेवाग्राही मारमा
काठमाडौं । स्वास्थ्य बीमा कार्यक्रम लागु भएका देशभरका अस्पतालमा विहानैदेखि सेवा अवरुद्ध भएको छ । केहीबेरमा सुचारु हुने स्वास्थ्य बीमा बोर्डका कार्यकारी निर्देशक दामेदर बसौलाले केही समयमा यो समस्या निराकरण हुने बताएका छन् ।केन्द्रीय सर्भरमा समस्या आएको कारण अस्पतालहरुले सेवा स्थगित गरेका हुन् । महाराजगञ्जस्थित त्रिभुवन विश्वविद्यालय शिक्षण अस्पतालले आज बिहानै सूचना टाँस गरी अस्पतालबाट दिइने सेवा स्थगित रहेको जानकारी गराएको छ ।
स्वास्थ्य बीमा बोर्डका एक अधिकारीले भने, बिहानैबाट सर्भरमा समस्या आएको केही समययमा सर्भेयरको समस्या समाधान भएपछि हामी पुन सेवा सुचारु गर्छौ ।‘गभरमेन्ट इन्टिग्रेट डाटा सेन्टर (जीआईडीसी) (केन्द्रीय सर्भर)मा समस्या आएपछि देशभरका स्वास्थ्य बीमाका सर्भर चलेका छैनन्,’ उनले भने, ‘सर्भर नचल्दा बिमितले पाउने सेवामा समस्या हुने नै भयो ।’
प्राविधिकहरु काममा खटिइसकेको केही समयमा समस्या समाधान हुने बोर्डका कार्यकारी निर्देशक बसौलाले बताए । केही हप्तादेखि नै सर्भरमा पटक–पटक समस्या आइरहेको छ । के कारणले यस्तो भइरहेको हामीले कारण खोजिरहेका छौं,’ उनले थपे ।
स्वास्थ्य बीमाको काम शनिबार बन्द हुने भएकाले अस्पतालहरुमा विहानैदेखि सेवाग्राहीको भीड बढिरहेको छ । अस्पतालहरुले सर्भरमा समस्या आएको भन्दै बिमित बिरामीलाई फर्काइरहेका छन् । जसले गर्दा सर्वसाधारण तथा बिरामी मर्कामा परेका छन् ।पछिल्लो समय स्वास्थ्य बीमाको सेवा गुणस्तरीय नभएको भन्दै सर्वसाधारणले गुनासो गर्दै आएका छन् ।
