चितवनबाट दुर्गा प्रसाईंको ‘कालोमोसो दस्ता’ का संयोजक शम्भु थापा पक्राउ
काठमाडौं । दुर्गा प्रसाईंको ‘कालोमोसो दस्ता’का केन्द्रीय संयोजक शम्भु थापालाई पक्राउ गरेको छ । बैंक तथा वित्तीय संस्थाका प्रमुखहरुलाई कालोमोसो दल्ने भनेर धम्की दिने थापा चितवनबाट पक्राउ परेका हुन् ।
उनलाई मंगलबार दिउँसो जिल्ला प्रशासन कार्यालय चितवनबाट सोधपुछका लागि नियन्त्रणमा लिइएको प्रहरीले जनाएको छ ।
धर्म, संस्कृति, राष्ट्र, राष्ट्रियता र नागरिक अभियानको नाममा गत फागुन १३ गते चितवनमा दुर्गा प्रसाईंले गरेको कार्यक्रममा थापालाई कालोमोसो दस्ताको केन्द्रीय संयोजक घोषणा गरिएको थियो। थापाले बैंक तथा वित्तीय संस्थाका प्रमुखहरुलाई कालोमोसो दल्ने घोषणा गरेका थिए ।
त्यसपछि बैंक तथा वित्तीय संस्थाका प्रमुखहरु जिल्ला प्रशासन कार्यालय चितवनमा पुगेर सुरक्षाको प्रत्याभूति गर्न गर्न र त्यस्ता व्यक्तिमाथि कारबाही गर्न माग गरेका थिए।
बैंक तथा वित्तीय क्षेत्रमा त्रास सिर्जना गर्ने अभिव्यक्ति दिएकोले थापालाई पक्राउ गरिएको चितवन प्रहरीले जनाएको छ। उनीमाथि अभद्र व्यवहारको मुद्दा दर्ता गरी कारबाही प्रक्रिया अगाडि बढाउने प्रहरीले तयारी गरिरहेको छ ।
