नयाँ लाईसेन्स वितरण नगर्ने अध्यक्ष सिलवालको घोषणाले बीमा क्षेत्रमा तरंग

समाचार टिप्पणी

पछिल्लो एक सातामा बीमा समितिका अध्यक्ष सूर्य प्रसाद सिलवालले कुनै पनि नयाँ बीमा कम्पनीको लाईसेन्स वितरण नगर्ने घोषणा गरेका छन् । निर्वाचनको मुखमा माफियाहरुले सेटिङमा लाईसेन्स हात पार्न गरेको भगिरथ प्रयासलाई धुलिसात गर्दै अध्यक्ष सिलवालबाट आएको श्रृंखलाबद्ध अभिव्यक्तिले बीमा क्षेत्रमा नयाँ तरंग पैदा गरेको छ ।

बैशाख लागे लगत्तै तीन वटा माईक्रो इन्स्योरेन्स कम्पनीको लाईसेन्स ल्याउने भन्दै एउटा गिरोह काठमाडौंको एक होटलमै भेला भएर बसेका थिए । विभिन्न स्वार्थ समुहले अर्थमन्त्रालय प्रधानमन्त्री कार्यालय समेतलाई प्रभावमा पारेर जीवन बीमा, निर्जिवन बीमा तथा लघुबीमाको लाईसेन्स निकाल्ने भन्दै बाहिर बाहिरै रकम समेत संकलन भइरहेका थिए ।

बीमा समितिका अध्यक्ष सूर्य प्रसाद सिलवालले गत शुक्रबार पत्रकारहरुका माँझ आफ्नो कार्यकालमा कुनै पनि नयाँ कम्पनीको लाईसेन्स वितरण नगर्ने प्रतिबद्धता जनाए । उक्त कुरालाई सेटिङमा संलग्न तत्वहरुले खासै महत्व दिएका थिएनन् । बरु छिट्टै लाईसेन्स हात पार्नेमा आशावादी थिए । आज पुनः बीमा समितिका अध्यक्ष सूर्य प्रसाद सिलवालले नयाँ लाईसेन्स वितरण नहुने स्पष्ट रुपमा बताए पछि विभिन्न रुपमा नयाँ लाईसेन्सका लविङ गरिरहेकाहरु हिस्स हुन पुगेका छन् ।

जनतालाई बीमा सेवा प्रवाह भन्दा पनि शेयर मूल्य बृद्धि भई १ः१० बनाउने योजनाका साथ लागेका सेटिङकर्ताहरु अध्यक्ष सिलवालको प्रतिबद्धता र भनाईबाट तनावमा परेका हुन् । नयाँ लाइसेन्स लिन प्रयासरत एक व्यक्तिले बीमापोष्टसँग आफूहरुको सपना चकनाचुर हुन लागेको गुनासो गर्र्न थालेका छन् । बीमा समितिका अध्यक्ष सिलवालले सार्वजनिक रुपमा प्रतिबद्धता जनाए जस्तै र आज बीमाकर्मीहरुका बीचमा भनेजस्तै नयाँ लाइसेन्ंस वितरण नगर्ने हो भने नयाँ कम्पनपीको लाईसेन्स मिलाउने भन्दै रकम उठाउन समेत भ्याईसकेका थुप्रै जना तनावमा पर्नेछन् ।

बीमा क्षेत्रको स्थायीत्व, विकास र समृद्धिका लागि नयाँ लाईसेन्स वितरण गर्न नहुने आवाज ढिलै भएपनि बीमा समितिका अध्यक्ष सिलवालले मनन् गर्न थालेकामा यस क्षेत्रका इमान्दार पेशाकर्मीहरु अध्यक्ष सिलवालको मन्तव्यबाट खुशी देखिएका छन् ।  पछिल्लो समय धेरै राजनीति घुसेको बीमा क्षेत्रमा नयाँ लाईसेन्स राजनीतिक पार्टीहरुले चुनाव खर्च उठाउने जोखिम बढिरहेको बेला अध्यक्ष सिलवालबाट अभिव्यक्तिले भने केही आशा गर्ने ठाउँ सिर्जना भएको चर्चा चल्न थालेको छ । आशा गरौं, अध्यक्ष सिलवालले शेयर लगानीकर्तालाई मात्रै फाइदा हुने नयाँ लाईसेन्सको चक्कर फस्नेछैनन् र बीमा क्षेत्रमा स्थायीत्व कायम हुनेछ ।

निर्जिवन बीमा कम्पनीहरुको सङ्ख्या घटाउने योजना छ, नयाँलाई लाइसेन्स दिन्नौः अध्यक्ष सिलवाल