प्राइम कमर्सियल बैंकको ऋणपत्रमा आवेदन दिने म्याद थप
काठमाडौं । प्राइम कमर्सियल बैंकले ऋणपत्र बिक्री नभएपछि म्याद थप गरेको छ । पहिलो चरणको निर्धारित समयमा बिक्री नभएपछि समय थपेर चैत ३० गतेसम्म पुर्याइएको हो ।
तोकिएको समय भित्र उक्त ऋणपत्रमा मागभन्दा बढी आवेदन नपरेपछि म्याद थप गरेको हो । बैंकले चैत १६ गतेदेखि २ अर्ब २५ करोड रुपैयाँ बराबरको २५ लाख इकाई ऋणपत्र बिक्री खुला गरेको हो ।
जसमा १० लाख इकाईमा सर्वसाधारण लगानीकर्ताले आवेदन दिन सक्नेछन् । बैंकले बाँकी १५ लाख इकाई अन्य संघसंस्थालाई बिक्री गर्नेछ । प्राइमले १० वर्ष अवधिको ऋणपत्र जारी गर्न लागेको हो । यसमा वार्षिक ब्याजदर १० प्रतिशत तोकिएको छ । प्राइमले ‘१० प्रतिशत प्राइम डिबेन्चर २०८८’ जारी गरेको हो ।
यो ऋणपत्र खरीदका लागि न्यूनतम २५ कित्तादेखि अधिकतम ५ लाख कित्ताका लागि आवेदन दिन सकिने व्यवस्था छ । ऋणपत्र निष्कासन तथा बिक्री प्रबन्धक आरबिबि मर्चेन्ट बैंकिङ्ग लिमिटेड रहेको छ ।
विक्री प्रबन्धकसँगै यो ऋणपत्र खरीदका लागि सी–आस्बा सदस्य बैंक तथा वित्तीय संस्था र तिनका शाखा कार्यालयहरुबाट आवेदन दिन सकिनेछ । यो ऋणपत्रलाई केयर रेटिङ्ग नेपालले कम कर्जा जोखिमको संकेत गर्ने ‘केयर एनपी डबल ए माइनस इस्यूअर रेटिङ्ग’ प्रदान गरेको छ ।
