एचआइडिसिएलको ३ करोड ३० लाख शेयर फागुन १ गतेदेखि पुनः लिलाम बढाबढ मार्फत बिक्रीमा
काठमाडौं । हाइड्रोइलेक्ट्रीसिटी इन्भेष्टमेन्ट एण्ड डेभलपमेन्ट कम्पनी (एचआइडिसिएल)ले बिक्री नभएको शेयर पुनः लिलाम बढाबढ प्रक्रिया मार्फत फागुन १ गतेदेखि बिक्री खुल्ला गर्ने भएको छ ।
कम्पनीको माघ २० गते बसेको संचालक समितिको बैठकले कम्पनीले यसअघि बिक्री गरेको हकप्रद शेयरमध्ये संस्थागत समूह अन्तर्गत बिक्री नभएको ३ करोड ३० लाख कित्ता शेयर पुनः लिलाम बढाबढ प्रक्रियामार्फत बिक्री खुल्ला गर्ने निर्णय गरेको हो ।
उक्त शेयरको न्यूनतम मूल्य १०० रुपैयाँ तोकिएको हुदाँ आवेदन दिदा सो वा सो भन्दा बढी मूल्य अकिंत गरी आवेदन दिन सकिनेछ ।
कम्पनीले यसअघि असोज ७ गतेदेखि १४ गतेसम्म सर्वसाधारण समूहको ३२ लाख २९ हजार ७२४ कित्ता र संस्थापक समूहको ३ करोड ३० लाख कित्ता शेयर लिलामीमा ल्याएको थियो । उक्त संस्थापक समूह तर्फको बिक्री नभएको शेयर कम्पनीले पुनः लिलामीमा ल्याउन लागेको हो ।
उक्त शेयर खरिद गर्ने चाहने इच्छुक जोसुकैले पनि फागुन १ गतेदेखी फागुन १५ गते सम्म आवश्यक कागजात संकलन गरी बिक्री प्रबन्धक ग्लोबल आइएमई क्यापिटल नक्साल काठमाडौं लगायत ग्लोबल आइएमई बैंकको विभिन्न शाखा मार्फत न्यूनतम १ सय कित्ता देखि अद्यिकतम १० ले भाग जाने संख्यामा आवेदन दिनुपर्नेछ ।
