महालक्ष्मी विकास बैंकको २०औं साधारण सभा पोष्टपोन्ड, कहिले हुँदैछ ?

२६ पुष २०७८, सोमबार ११:३४

काठमाडौं । महालक्ष्मी विकास बैंक लिमिटेडले पुष २५ गतेका लागि बोलाएको २०औं वार्षिक साधारण सभा स्थगित भएको छ । बैंकले उक्त सभा कम्पनीको गणपूरक संख्या नपुगेपछि स्थगित गरेको हो । साथै बैंकले सो सभा माघ ३ गते बस्नेगरी पुनःआह्वान गरेको छ ।

कम्पनीको पुस २५ गते बसेको संचालक समितिको बैंठकले काठमाडौंको दरबारमार्ग स्थित केन्द्रिय कार्यालय तथा अनलाइन मार्फत हुने गरि सभा माघ ३ मा बोलाएको हो ।

सोही संचालक समितिको बैठकभन्दा अघि बैंकले एक सूचना प्रकाशित गर्दै कम्पनीका शेयरधनीहरु गिरिराज पोखरेल र प्रमोद श्रेष्ठले कम्पनीविरुद्ध उच्च अदालत पाटनमा निवेदन दिएका कारण संचालक समिति निर्वाचन एजेण्डालाई स्थगित गरेको थियो । उक्त निवेदन उपर माघ ३ गते पेशी तोकिएकाले सो अवधिसम्म निर्वाचनको बाँकी काम कारवाही नगर्ने निर्णय कम्पनीले गरेको हो ।

बैंकले गत आर्थिक वर्षको मुनाफाबाट शेयरधनीहरुलाई २० प्रतिशत बोनस शेयर र कर प्रयोजनका लागि १ दशमलव शून्य ५३ प्रतिशत नगद लाभांश गरी कुल २१ दशमलव शून्य ५३ प्रतिशत लाभांश प्रस्ताव गरेकोमा माघ ३ गते हुने साधारण सभाले पारित गर्नेछ ।

साथै सोही सभाले गत आर्थिक वर्षसम्मको वार्षिक प्रतिवेदन सहितका वित्तीय विवरणहरु पारित गर्नुका साथै चालू आवको लागि लेखापरिक्षक नियुक्ती र निजको पारिश्रमिक निर्धारणको विषयलाई पनि कार्य सूचिमा राखेको छ । यी प्रस्तावसँगै बैंकले सञ्चालक समितिको बैठक भत्ता, दैनिक भ्रमण भत्ता लगाएतका अन्य सुविधालाई बृद्धि गर्ने प्रस्ताव समेत पारित गर्ने छ ।

साधारण सभा प्रयोजन र लाभांश वितरणका लागि कम्पनीले पुस १३ गते एक दिन बुक क्लोज गरेको हुदाँ पुस १२ गतेसम्म कायम शेयरधनीहरु मात्र सभामा भाग लिन र लाभांश प्राप्त गर्न सक्नेछन् ।

पाठक प्रतिक्रिया :

Your email address will not be published. Required fields are marked *


*