चन्द्रागिरी हिल्सले पैदलयात्रीसँग रकम उठाउने कार्य गैर कानुनीः थाहा नगरपालिका, तत्काल बन्द गर्न निर्देशन
काठमाडौं । राजधानीको उत्तर पश्चिमतर्फ रहेको चन्द्रागिरी हिल्सको भालेश्वर मन्दिरमा जान चाहने पैदलयात्रीसँग प्रति व्यक्ति १०० रुपैयाँ प्रवेश शुल्क उठाउँदै आएको चन्द्रागिरी हिल्सको कार्य गैर कानुनी भएको थाहा नगरपालिकाले स्पष्ट पारेको छ ।
थाहा नगरपालिका वडा नं ९ का अध्यक्ष राज कुमार बलामीले आज एक सूचना जारी गर्दै थाहा नगरपालिकाको समेत स्वामित्वमा रहेको चन्द्रागिरीको मन्दिर तथा सो क्षेत्रमा यात्रा गर्न चाहने यात्रुसँग रकम उठाउने कार्य तत्काल बन्द गर्न चन्द्रागिरी हिल्सलाई सुचित गरेको छ ।
थाहा नगरपालिकाले जारी गरेको सूचनामा चन्द्रागिरी हिल्सले सार्वजनिक जंगलमा अनाधिकृत रुपमा चेक प्वाईन्ट राखेर सर्वसाधारण पैदलयात्रीसँग रकम उठाउने सम्बन्धी कुनै सहमति नदिइएको स्पष्ट पारेको छ ।
थाहा नगरपालिकाले भालेश्वर मन्दिरतर्फ जाने पैदलयात्रुसँग टिकट नै काटेर शुल्क लिने कार्य तत्काल बन्द गर्न पनि निर्देशन दिएको छ । साथै थाहा नगरपालिकाले चन्द्रागिरी हिल्सलाई सार्वजनिक सडकमा राखिएको चेक प्वाईन्ट ७ दिनभित्र हटाउन पनि निर्देशन दिएको छ ।
स्मरणरहोस्, बीमापोष्टले हिजो मात्रै चन्द्रागिरी हिल्सले भालेश्वर मन्दिरमा जाने पैदल यात्रीसँग १०० रुपैयाँ प्रवेश शुल्क लिएको सम्बन्धी समाचार प्रकाशित गरेको थियो ।
चन्द्रागिरी हिल्सद्वारा पैदलयात्रा गरेर मन्दिरमा पुगेका दर्शनार्थीसँग १०० रुपैयाँ शुल्क असुली
