भक्तपुरमा कार र मोटरसाइकल ठोक्किदा एक महिलाको निधन
काठमाडौं । भक्तपुरमा कार र मोटरसाइकल ठोक्किदा घाइते भएकी एक महिलाको ज्यान गएको छ। ज्यान गुमाउनेमा मोटरसाइकल चालक राजु राईकी श्रीमती रहेको प्रहरीले जनाएको छ।
गत सोमबार मध्यपुरथिमी नगरपालिका–२ दिव्यश्वरीस्थित सडकमा पेप्सीकोलाबाट मगर गाउँतर्फ जाँदै गरेको बा.प्र.०१–०२७च.९२७ नम्बरको कार र सोही दिशातर्फ जाँदै गरेको बा५०प ७४१ नम्बरको मोटरसाइकल ठोक्किएको थियो।
दुर्घटनामा भोजपुर घर भई हाल काठमाडौं पेप्सीकोला बस्ने मोटरसाइकल चालक राजु राईकी श्रीमती सपना राई गम्भीर घाइते भएकी थिइन्। उनलाई उपचारका लागि मदरल्याण्ड अस्पाताल लगिएको थियो। त्यहाँबाट थप उचारका लागि काठमाडौं मेडिकल कलेज सिनामंगल लगिएकोमा उपचारका क्रममा बुधबार मृत्यु भएको प्रहरीले जानकारी दिएको छ।
दुर्घटनामा घाइते भएकी तीन वर्षीय छोरी ईश्वरीको सोही अस्पतालमा उचारपछि डिस्चार्ज गरिएको प्रहरीले जनाएको छ।
कार चालक रामेछाप सुनापाती गाउँपालिका–१ घर भई हाल बूढानीलकण्ठ–४ बस्ने ३४ वर्षीय कृष्णप्रसाद गौतमलाई प्रहरीले नियन्त्रणमा लिएर थप अनुसन्धान गरिरहेको छ।
