गढीमाई मेलामा सशस्त्र प्रहरीका ५ सय सुरक्षा फौज परिचालन
काठमाडौं । बाराको महागढीमाई नगरपालिका–१ स्थित गढीमाई मन्दिरमा लागिरहेको पञ्चवर्षीय मेला २०८१ को सुरक्षार्थ करिब ५ सय जना सशस्त्र प्रहरी २४ सै घण्टा परिचालन गरिएको छ । मङ्सिर १ गतेदेखि सुरु भएको मेला मङ्सिर ३० गतेसम्म सञ्चालन हुने बताइएको छ ।
मेलालाई सुरक्षित एवं भयरहित बनाउन गराउनका लागि नम्बर १२ गण बाराबाट सशस्त्र प्रहरी उपरीक्षक सन्तोष बहादुर सिंहको कमान्डमा टोली परिचालन भएको छ भने मेला सुरक्षा योजना अनुसार सशस्त्र प्रहरी नायव उपरीक्षक रविन सिलवालको कमान्डमा मेला अवधिभरको लागि मेलास्थमा कमान्ड पोस्ट स्थापना गरिएको छ ।
मेला सुरक्षार्थ २ वटा तालिम प्राप्त डग परिचालन गरिएको छ । मेलामा भिड व्यवस्थापन र निगरानी गर्न ड्रोनको प्रयोग गरिएको छ भने मेला परिसरमा रहेको पोखरीमा कुनै पनि अप्रिय घटना नघटोस् भनी विपद् व्यवस्थापन तालिम प्राप्त टोली रबर बोटसहित २४ सै घण्टा तैनाथ रहेको छ ।
यो मेलामा ठ्रूलो सङ्ख्यामा भक्तजनहरूको उपस्थिति हुने भएकाले मेला सुरक्षा योजनाअनुसार सशस्त्र बल नेपालले उच्च सतर्कता अपनाउँदै सुरक्षा व्यवस्था थप मजबुत बनाउन मेला अवधिभर परिचालित रहने सशस्त्र प्रहरका प्रवक्ता नायब महानिरीक्षक कुमार न्यौपाने जानकारी दिएका छन् ।
