अर्बौं घुस खुवाएर बीमा कम्पनीको लाइसेन्स लिने प्रयासमा राजेशबाबु श्रेष्ठ, अर्थमन्त्री पौडेलको नियतै खोटो

काठमाडौं । नेपालको चर्चित र विवादमा कमै मात्र पर्ने चितवन कोई समुह पनि अर्बौ रुपैयाँ घुस सेटिङ गरेर बीमा कम्पनीको लाइसेन्स लिने दौडमा अघि बढेको छ । नेपालको व्यापारिक जगतमा एउटा प्रख्यात नाम छ, स्व. लक्ष्मण बाबु श्रेष्ठ । उनैका छोरा राजेशबाबु श्रेष्ठ यतिबेला मनकामना इन्स्योरेन्स कम्पनीको लाइसेन्स हत्याउन अर्बौ रुपैयाँ घुस सेटिङ गर्न दौडधुप गरिरहेका छन् । यद्यपि श्रेष्ठ स्वयम्ले भने इन्कारी बयान दिएका छन् ।

मनकामना केवलकार निर्माण गरेर सफलतापूर्वक सञ्चालन गर्दै आएको चितवन कोई समुहका अध्यक्ष राजेश बाबु श्रेष्ठको नेतृत्वमा नयाँ बीमा कम्पनीको लाईसेन्सको लागि उच्च तहमा डिल भइरहेको छ । स्रोतका अनुसार अर्थमन्त्री विष्णु पौडेलको लागि आवश्यक रकम भुक्तानी भइसकेको छ । कालु गुरुङ नामका कालोधनको कारोबार गर्ने एक घरजग्गाका दलालमार्फत नयाँ बीमा लाइसेन्स बापतको घुस रकम भुक्तानीको सेटिङ गरिएको भनाई छ । अन्य राजनीतिक पार्टीका नेताहरुलाई पनि आवश्यकता अनुसार रकम डिल भइसकेको र लाइसेन्स पाउने प्रक्रिया सुरु भएपछि बाँकी भुक्तानी हुने गरी काम अघि बढाउन खोजिएको बताइन्छ ।

त्यसको लागि मनकामनाका मालिक श्रेष्ठले आफूले लिने बाहेकको शेयरबापतको रकममा घुस रकम (प्रिमियम) जोडेर असुल गर्ने गरेको बताइन्छ । यद्यपि बीमापोष्टले व्यापारिक प्रतिनिधिसँग उक्त तथ्य पुष्टि भने गरेको छैन । नेपालमा बीमा लाइसेन्स वितरण गर्दा विगतमा तीन अर्ब रुपैयाँसम्म घुस सेटिङ गर्ने गरिएको इतिहास छ । यसअघिका अर्थमन्त्री जनार्दन शर्माले ७ वटा लघुबीमाको लाइसेन्स घुस बढाबढमा बिक्री गरेका थिए । अहिलेका अर्थमन्त्री बिष्णु पौडेल पनि जनार्दन शर्माकै लाइनमा अघि बढेका छन् ।

२०६५ सालतिर तत्कालिन बीमा समितिमा नयाँ कम्पनी दर्ता गर्न श्रेष्ठकै नाममा मनकामना इन्स्योरेन्स कम्पनीको निवेदन दर्ता भएको थियो । सोही आधारमा मनकामना इन्सुरेन्स नामक कम्पनी कम्पनी रजिष्टारको कार्यालयमा पनि दर्ता रहेको छ । २०६५ साल बैशाख ६ गते कम्पनी रजिष्टारको कार्यालयमा दर्ता भएको मनकामना इन्सुरेन्स कम्पनी लि.लाई अहिले ब्यूँताएर लाइसेन्स लिन श्रेष्ठले प्रक्रिया अघि बढाएका छन् । कामपा १, नक्सालमा केन्द्रीय कार्यालय रहेको मनकामना इन्सुरेन्सको कम्पनी दर्ता नं १०६२ हो । सोही कम्पनीलाई अहिले मनकामना केवलकारका मालिक श्रेष्ठले अर्बौ घुस सेटिङमा लाइसेन्स लिन पहल अघि बढाएका छन् ।

उक्त लाइसेन्स लिने प्रक्रियाको केन्द्रमा बिष्णु पौडेललाई नै राखेका छन् । मन्त्री पौडेल निकटका व्यक्तिलाई समेत शेयर व्यवस्था हुने गरी नयाँ लाइसेन्सको प्रक्रिया अघि बढाउन खोजिएको छ, विश्वस्त स्रोतले बीमापोष्टलाई भन्यो । ‘उहाँले ठूलो रकम खर्च गरिसक्नु भएको छ, लाइसेन्स पाउनुहुन्छ होला’, स्रोतले भन्यो ।

मनकामना केवलकारका मालिक तथा मनकामना इन्सुरेन्स कम्पनी नामक कम्पनी दर्ता गर्ने राजेश बाबु श्रेष्ठसँग जिज्ञाशा राख्दा घुस खुवाएर लाईसेन्स लिन लागेको कुरा वाईयात भएको प्रक्रिया दिएका छन् । उनले भनेका छन्, ‘’हामीले नयाँ बीमा कम्पनी खालेका छैनौं, बीमा कम्पनीमा लगानी पनि गरेका छैनौं ।’ थप प्रतिक्रिया दिन मानेनन् ।

श्रेष्ठले माथि सेटिङ मिलाएपछि तल बीमा प्राधिकरणमा नयाँ लाइसेन्स दिने सम्बन्धमा दवाव बढाइएको छ । अर्थमन्त्रीमार्फत दवाव बढाइएको हो । यसअघि पनि लाइसेन्स बेचेर दह्रो हात पारेकोले पल्केकोले अहिले पनि मीठो गेम गर्ने अभियान अन्तर्गत बीमा प्राधिकरणमा अर्थमन्त्रालयको चर्को दवाव परिरहेको छ ।

उता, नियामक बीमा प्राधिकरणका उच्च तहका अधिकारीहरु तत्काल नयाँ लाइसेन्स सम्भव नभएको प्रतिक्रिया दिन्छन् । बीमा प्राधिकरणका अध्यक्ष सुर्य प्रसाद सिलवालको पदावधी सकिन अब धेरै दिन बाँकी नरहेको र हालसम्म कुनै पनि प्रक्रिया सुरु नभएकोले तत्काल नयाँ लाइसेन्स सम्भव नभएको भनाई प्राधिकरणका अधिकारीहरुको छ । यद्यपि अर्थमन्त्री पौडेलले चाहेको अवस्थामा बीमा प्राधिकरणको अध्यक्षमार्फत एक सातामै पनि तोक आदेशको भरमा लाइसेन्स दिन सक्ने अवस्था रहेको स्वीकार गर्दछन् । तर, सिंहदरवारस्थित अर्थमन्त्रालयभित्र भने बीमा कम्पनीको नयाँ लाइसेन्स अहिलेको अध्यक्षबाट नभए नयाँ अध्यक्षमार्फत गराउन खेल हुनसक्ने पनि बताउँछन् ।