लघुवित्त क्षेत्रमा अनियमितताः २ संस्थालाई जरिवाना, ७ लाई निर्देशन उल्लंघनका लागि कारबाही
काठमाडौं। नेपाल राष्ट्र बैंकले गत आर्थिक वर्ष २०८०/८१ मा दुई लघुवित्त वित्तीय संस्थामाथि जरिवाना लगाउँदै कारबाही प्रक्रिया अघि बढाएको छ। अनिवार्य नगद अनुपात कायम गर्न नसकेको भन्दै यी संस्थाहरूमाथि कारबाही गरिएको हो। यद्यपि, राष्ट्र बैंकले ती संस्थाहरूको नाम भने सार्वजनिक गरेको छैन।
राष्ट्र बैंकले गत वर्ष ४० वटा लघुवित्तको स्थलगत निरीक्षण तथा ३ वटा संस्थाको विशेष स्थलगत निरीक्षण सम्पन्न गरेको थियो। पुनरकर्जा, व्यवसायिक कर्जा, र सहुलियतपूर्ण कर्जाको सदुपयोगसम्बन्धी अध्ययनका क्रममा २ वटा लघुवित्तले नियम उल्लंघन गरेको पाइएको छ। यसका साथै, निर्देशनको पालना नगरेको आधारमा थप ७ वटा लघुवित्तलाई कारबाही र निर्देशन जारी गरिएको छ।
संस्थागत सुधारको क्रममा, राष्ट्र बैंकले २७ वटा लघुवित्तका प्रमुख कार्यकारी अधिकृतलाई औपचारिक निर्देशन दिएको छ।
राष्ट्र बैंकको तथ्यांकअनुसार, गत असार मसान्तसम्म लघुवित्त संस्थाहरूको कुल सम्पत्ति ५ खर्ब ५३ अर्ब ७३ करोड रुपैयाँ पुगेको छ। ती संस्थाहरूको कुल निक्षेप १ खर्ब ७६ अर्ब ६६ करोड रुपैयाँ र सापटी २ खर्ब ३० अर्ब ७५ करोड रुपैयाँ रहेको छ। साथै, कुल कर्जा प्रवाह ४ खर्ब ५५ अर्ब ८५ करोड रुपैयाँमा पुगेको छ भने लगानी १० अर्ब १९ करोड रुपैयाँमा सीमित रहेको छ।
राष्ट्र बैंकले यस कदममार्फत लघुवित्त क्षेत्रमा पारदर्शिता र संस्थागत अनुशासनको सुनिश्चितता गर्ने प्रयास गरेको छ।
