४९ उद्योगले विद्युत् महसुल बुझाउने समय २ दिन मात्रै बाँकी, लाइन काट्ने तयारीमा कुलमान
काठमाडौँ । नेपाल विद्युत् प्राधिकरणले ४९ वटा उद्योगलाई डेडिकेटेड फिडर र ट्रंकलाइनको प्रिमियम महसुल तिर्न दुई दिनको अन्तिम समय दिएको छ। प्राधिकरणले असोज २४ गते सार्वजनिक सूचना जारी गर्दै कार्तिक ८ गतेसम्मको समय दिएको थियो, जसअनुसार उद्योगहरूले बिहीबारसम्म बक्यौता तिर्नुपर्नेछ। यदि तोकिएको समयभित्र महसुल नतिरेमा प्राधिकरणले विद्युत् लाइन काट्ने चेतावनी दिएको छ।
प्राधिकरणले यसअघि असोज २२ गते उद्योगहरूलाई छुट्टाछुट्टै पत्र पठाएर महसुल तिर्न ताकेता गरेको थियो। उक्त ताकेतापछि पनि उद्योगहरूले बक्यौता नतिरेपछि असोज २४ गते पुनः सार्वजनिक सूचना प्रकाशन गरी अन्तिम सूचना जारी गरिएको हो।
नेपाल विद्युत् प्राधिकरणका कार्यकारी निर्देशक कुलमान घिसिङले यस विषयमा कडा कारबाहीको तयारी गरिरहेका छन्। उनले बक्यौता नतिर्ने उद्योगहरूलाई कानुनी कारबाही अघि बढाउन आवश्यक छलफल गरिरहेको प्राधिकरण स्रोतले जनाएको छ। उर्जा मन्त्रालयसँग पनि यसबारेमा निरन्तर छलफल भइरहेको बताइएको छ।
प्राधिकरणले यसअघि नै महसुल नतिर्ने कम्पनीहरूमाथि कानुनी कदम चाल्ने चेतावनी दिइसकेको छ। अब उद्योगहरूले निर्धारित समयभित्र महसुल नबुझाए प्राधिकरणले ती उद्योगहरूको विद्युत् आपूर्ति स्थगित गर्ने तयारी गरिरहेको छ, जसले उनीहरूको उत्पादन र सञ्चालनमा गम्भीर असर पर्ने सम्भावना छ।
प्राधिकरणले डेडिकेटेड फिडर र ट्रंकलाइन सेवाका लागि उद्योगहरूबाट अतिरिक्त प्रिमियम महसुल उठाउँदै आएको छ, तर केही उद्योगहरूले लामो समयदेखि यो महसुल नबुझाएको कारण प्राधिकरणले यस्तो कडा कदम चाल्न बाध्य भएको हो।
