बजाज पल्सर एन १२५ भारतमा सार्वजनिक, यस्ता छन् विशेषता

काठमाडौँ । भारतको प्रमुख दुईपांग्रे सवारी साधन निर्माता कम्पनी बजाज अटोले आफ्नो नयाँ बजाज पल्सर एन १२५ लाई औपचारिक रूपमा भारतीय बजारमा सार्वजनिक गरेको छ। आकर्षक लुक र शक्तिशाली इन्जिनले सुसज्जित यो किफायती बाइकको सुरुवाती मूल्य ९४,७०७ भारतीय रुपैयाँ (एक्स-शोरुम) तोकिएको छ।

बजाजले नयाँ पल्सर एन १२५ लाई शहरी सवारीका लागि उपयुक्त बनाउने गरी डिजाइन गरेको छ। यसलाई विशेष गरी सहरका सडकमा उत्कृष्ट अनुभव प्रदान गर्ने गरी बनाइएको छ। यो बाइकको डिजाइन नेक्ड स्ट्रिटफाइटर स्टाइलमा तयार पारिएको हो, जसमा ट्रेन्डी ग्राफिक्सले सजावट गरिएको छ। यसका साथै, स्कल्प्टेड फ्युल ट्यांक र फ्लोटिंग प्यानल्सले बाइकलाई थप खेलकुदमय लुक दिन्छन्।

यो बाइकमा १२४.५८ सीसीको क्षमता भएको सिंगल सिलिन्डर, लिक्विड कुल्ड इन्जिन दिइएको छ, जसले १२ पीएस पावर र ११ एनएम टर्क उत्पन्न गर्छ। कम्पनीको दाबी अनुसार, यो बाइकको पावर टु वेट रेसियो निकै उत्कृष्ट छ, जसले बाइकलाई उत्कृष्ट एक्सेलेरेशन प्रदान गर्न मद्दत गर्छ। यो पल्सर शृंखलाको पहिलो मोडल हो जसमा इंटिग्रेटेड स्टार्टर जेनेरेटर प्रविधि समावेश गरिएको छ। यसले बाइकलाई साइलेंट स्टार्टको सुविधा दिन्छ, जुन प्रविधि अन्य बाइकहरूमा कमै देखिन्छ।

यो बाइकको कुल वजन १२५ केजी छ, र यसका सीटको उचाइ ७९५ मिमी छ, जसले छोटो कद भएका व्यक्तिहरूलाई पनि आरामदायक सवारीको अनुभव दिन्छ। यसमा १९८ मिमीको ग्राउन्ड क्लियरेन्स दिइएको छ, जसले खराब सडकमा पनि उत्कृष्ट प्रदर्शन गर्न सहयोग पुर्याउँछ।

बजाज पल्सर एन १२५ लाई दुई भेरिएन्टमा उपलब्ध गराइएको छ। जसमा एलईडी डिस्क ब्लुटुथ र एलईडी डिस्क समावेश छन्। यसमा डिजिटल इन्स्ट्रुमेन्ट कन्सोलसहित ब्लुटुथ कनेक्टिभिटीको सुविधा छ, जसले प्रयोगकर्तालाई स्मार्टफोनसँग बाइक कनेक्ट गर्न सक्छ। यसमा कल एक्सेप्ट र रिजेक्ट, मिस्ड कल, मेसेज अलर्ट र फ्युल इकोनोमीसम्बन्धी जानकारी प्राप्त गर्न सकिन्छ। साथै, बाइकमा यूएसबी चार्जिङ पोर्ट पनि उपलब्ध छ।