अन्तर्राष्ट्रिय समावेशी बीमा सम्मेलनको उपराष्ट्रपति यादवद्वारा औपचारिक उद्घाटन
काठमाडौं । विश्वभरका ५०० भन्दा बढि बिज्ञ तथा प्रतिनिधिहरु सहभागी भइरहेको अन्तर्राष्ट्रिय समावेशी बीमा सम्मेलनको आज विहान भव्य समारोहका बीचमा उपराष्ट्रपति राम सहाय यादवबाट उद्घाटन सम्पन्न भएको छ । उपराष्ट्रपति यादवले पानसमा दीप प्रज्वलन गर्दै भव्य र ऐतिहासिक अन्तर्राष्ट्रिय सम्मेलनको उद्घाटन गर्नु भएको हो ।
म्यूनिख रि फाउण्डेशनका अध्यक्ष रेनाट ब्लेईच, नेपाल बीमा प्राधिकरणका अध्यक्ष सुर्य प्रसाद सिलवालसहितको उपस्थितिमा यही अक्टोवर २५ तारिखसम्म सञ्चालन हुने अन्तर्राष्ट्रिय बीमा सम्मेलनको औपचारिक उद्घाटन गरिएको हो ।
सम्मेलनमा नेपालबाट दुई सय भन्दा बढि प्रतिनिधिहरु सहभागी छन् भने विश्वका अन्य ४० देशका करिब ३०० जना बीमा बिज्ञ तथा प्रतिनिधिहरु सहभागी रहेका छन् । म्युनिख रि फाउण्डेशनको मुख्य रणनीतिक योजनामा सञ्चालन हुने सम्मेलनमा नेपालबाट नेपाल बीमक संघ, जीवन बीमक संघ नेपाल, लघु बीमक संघ तथा माइक्रो इन्स्योरेन्स नेटवर्क कार्यक्रम सफल पार्न सहभागी भएका छन् ।
सम्मेलनमा न्यून आय भएका जनताको बीचमा बीमाको पहुँच स्थापित गर्ने सम्बन्धमा गहन र फराकिलो छलफल हुनेछ ।
सम्मेलनमा न्यून आय भएका तथा जोखिममा रहेका परिवारहरू तथा लघु, साना र मझौला उद्योगलाई केन्द्रित गरी समावेशी बीमालाई परिष्कृत गर्नेलगायतका विषयमा विस्तृत छलफल हुने आयोजकले जनाएको छ ।
यसैगरी, जलवायु जोखिम बीमा, लघुबीमामा डिजिटल प्रविधि अवलम्बन र समावेशी बीमाका क्षेत्रका आइपर्ने अवरोधहरु हटाउनेसम्बन्धी रणनीतिहरूलगायतका विषयमा सहभागीहरूबीच छलफल केन्द्रित हुनेछ ।
सम्मेलनका विभिन्न सत्रहरूमा जलवायु परिवर्तन र प्रकोप जोखिम वित्त व्यवस्थापन, बीमा क्षेत्रका चुनौती तथा अवसरहरू, बीमाको अन्तर र बीमाको पहुँच विस्तारमा डिजिटल प्रविधिको विकास एवम् अवलम्बन जस्ता मुख्य विषयहरूमा विभिन्न कार्यपत्र प्रस्तुतिका साथै कार्यपत्रहरूमाथि छलफल हुने कार्यक्रम पनि रहेको छ ।
सम्मेलनमा नेपाल लगायत विभिन्न देशका बीमा क्षेत्रका नियामक निकाय, विभिन्न निकाय, विकास साझेदार, गैरसरकारी संस्था र बीमा क्षेत्रका विज्ञहरू गरी चारसयभन्दा बढीको सहभागिता रहेको छ ।
समाजमा आर्थिकरूपमा पछाडि परेका वर्ग र लघु, साना तथा मझौला उद्योगहरूको वित्तीय जोखिम न्यूनीकरणका लागि समावेशी बीमालाई अगाडि बढाउने सम्बन्धमा सम्मेलन कोशेढुङ्गा सावित हुने विश्वास गरिएको छ ।
