लगातार छैठौं दिन समेत बजारमा गिरावटः लगानीकर्तामा थपिदै चिन्ता र निराशा, कहिलेसम्म गुम्छ रकम ?

काठमाडौँ । पुँजी बजार लगातार छैठौं दिन समेत ओरालो लागेको छ । लगानीकर्ताको मनोबल घट्दै जाँदा शेयर बजारमा समेत गिरावट आइरहेको हो । जसले लगानीकर्ताहरूमा चिन्ता र निराशा थपेको छ । बजार सूचकांकमा निरन्तर गिरावट देखिँदा धेरै कम्पनीका शेयरहरूको मूल्यमा गिरावट आएको छ । बजारको यो नकारात्मक प्रवृत्तिले आर्थिक क्षेत्रमा थप अनिश्चितता ल्याइरहेको छ, जसले गर्दा लगानीकर्ताहरू सतर्क रहन बाध्य छन्।

धेरै लगानीकर्ताहरू आफ्नो पुँजी सुरक्षित राख्नको लागि जोखिमयुक्त लगानीहरूबाट पछि हटिरहेका छन्, जसले गर्दा बजारमा गिरावट देखिएको छ । सरकार परिवर्तन हुने डरले शेयर बजारमा तीव्र गिरावट आएको छ। राजनीतिक अस्थिरता र सरकार परिवर्तनको सम्भावनाले लगानीकर्ताहरूमा चिन्ता बढेको छ, जसका कारण धेरैले आफ्नो लगानी फिर्ता लिन थालेका छन्। आगामी दिनमा नयाँ सरकार आएमा नीतिगत परिवर्तन हुन सक्ने र त्यसले आर्थिक वातावरणमा असर पुर्याउन सक्ने डरले गर्दा बजारमा अनिश्चितता बढेको छ । यसले गर्दा लगानीकर्ताहरू बजारबाट बाहिरिन थालेका छन्, जसका कारण शेयर मूल्यहरू लगातार घटिरहेका छन् ।

नेपालको अर्थतन्त्र बिस्तारै लयमा फर्किंदैछ, जसको संकेतहरू बैंकहरूको घट्दो ब्याजदर र आर्थिक क्रियाकलापमा देखिएको सुधारबाट स्पष्ट भएको छ । बैंकहरूले ऋणको ब्याजदरमा कमी ल्याएसँगै लगानीकर्ताहरूको मनोबल बढेको छ, जसले पूँजी बजारलाई थप सक्रिय बनाउने अपेक्षा गरिएको छ ।

नेपाल स्टक एक्सचेञ्ज (नेप्से) २२.७३ अकंले घटेर २६१०.२१ बिन्दुमा कायम भएको छ । आज ३१७ कम्पनीको १ करोड ५४ लाख २८ हजार ७२४ कित्ता शेयर किनबेच हुँदा ६ अर्ब ८५ करोड ११ लाख ७९ हजार रुपैयाँको कारोबार भएको हो ।

बुधबार १० उपसूचक राताम्य भएका छन् । यसदिन फाइनान्स समूहको ०.४३ प्रतिशत, निर्जीवन बीमा समूहको ०.०२ प्रतिशत र व्यापार समूहको ०.१६ प्रतिशतले शेयर मूल्य बढेको हो ।

आज १७४ कम्पनीको शेयर मूल्य घट्दा ६६ कम्पनीको मूल्य बढेको छ ।