बिवाईडि गाडीको ड्यास बोर्ड कनेक्सन गर्ने वायर नेपालमा नपाइने समस्या, सामान्य तारको साढे २ लाख असुली

काठमाडौँ । गाडी बिक्री गरेपछि स्पेयर पाट्र्समा ठगी गर्ने परम्परा नेपालको पुरानै हो । चाहे त्यो टोयोटा होस वा होण्डा किन नहोस् । अटो क्षेत्रमा छुट्टै पहिचान बनाइरहेको बिवाईडि ईभि गाडीको पनि विभिन्न पाट्र्स नेपालमा नपाइने र पाइहालेमा कम्पनीले अत्याधिक महंगो मूल्य लिएर ग्राहकलाई ठगी गर्ने गरेको तथ्य फेला परेको छ । बिवाईडि गाडीको विद्युतीय प्रणाली र यसका विभिन्न इलेक्ट्रोनिक कम्पोनेन्टहरू कनेक्सन गर्ने तार (बिवाईडी हार्नेस) नेपालमा नपाउँदा सो गाडी किनेका ग्राहकहरु मर्कामा परेका छन् ।

हेर्दा आकर्षक तर गुणस्तरमा समस्या रहेको बिवाईडी गाडिको वायर हार्नेस नेपालमा नपाइने भएपछि ग्राहकहरुलाई हैरानी व्यहोर्नु परेको गुनासो प्रयोगकर्ताहरुले बीमापोष्ट समक्ष गरेका छन् । हार्नेस नामक वायरले बिवाईडीको मेन बोर्डबाट ड्यासबोर्ड तथा अन्यत्र कनेक्सन गर्ने गर्दछ । हार्नेसले एक कम्पोनेन्टबाट अर्कोमा सञ्चालनको क्रममा शक्ति र सञ्चार आदान–प्रदान गर्दछ । हार्नेस बिना गाडिमा पावर अवरोधहरू, कम दक्षता, र सम्भावित आगो उत्पन्न हुने खतराहरू हुन्छ । उक्त हार्नेस नामक तारको नियमित निरीक्षण आवश्यक पर्छ । जसले गर्दा थप गम्भीर समस्याहरू उत्पन्न हुनु अघि क्षतिको कुनै पनि संकेत पत्ता लगाउन सकिन्छ ।

हार्नेस नामक तार बिवाईडी सवारी साधनको अभिन्न अंग हो । यसको औसत लम्बाइ ४ मिटरको भएतापनि हजारौं साना अविभाज्य कम्पोनेन्टहरू मिलेर बनेको हुन्छ । यी कम्पोनेन्टहरूमा सुरक्षा एयरब्यागहरू, एबिएस ब्रेकहरू, सिग्नल लाइटहरू र आवश्यक इन्जिन भागहरू समावेश गरेका हुन्छन् ।

सोहि हार्नेस नेपालमा उपलब्ध नभएको तथ्य खुलेको छ । अहिले सोही तार नपाउँदा सयौ बिवाईडि गाडी शोरुममा थन्किएर बसेका छन् । विदेशबाट पाट्स मगाउने पर्ने भन्दै एक महिनासम्म कार शोरुममा राख्नुपर्ने बाध्यता रहेको एक विबाईडिका ग्राहकले बीमापोष्टलाई बताए । उनले भने, ‘केहि दिन अघि काठमाडौँमा आएको बाढीले मेरो बिवाईडि कार डल्फिन बिग्रीएको थियो । शोरुमसम्म पुराए । हार्नेस पाट्स राख्नुपर्ने भयो । तर, नेपालका कुनै पनि शोरुममा उक्त पाट्स छैन रे । विदेशबाट मगाउँदा २० देखि ३० दिन लाग्ने जानकारी दिएको छ । अहिले गाडी गुडाउन सकेको छैन ।’

हार्नेस विदेशबाट मगाउनुपर्ने भएकाले सो पाट्स नेपालमा आइपुग्दा करिब २ लाखदेखि २ लाख ५० हजारसम्म पर्ने जानकारी शोरुमले दिएको ति ग्राहकले बताए । ‘ विद्युतीय तार हार्नेस नेपालमा नपाइदा सयौ गाडि शोरुममा थन्किएका छन् । उक्त पाट्स नेपालसम्म आइपुग्दा २ लाखदेखि ५० लाखसम्म पर्ने भनिएको छ । अहिले ट्याक्सी चढेर आवत जावत गरिरहेको छु । बिवाईडिको गाडि किनेर निकै हैरान भयो’ कालिमाटीका ति प्रयोगकर्ताले भने ।

हार्नेस मात्र नभइ अन्य पाट्सहरु पनि नेपालमा सजिलै उपलब्ध नहुने गरेको ग्राहकहरुको गुनासो रहेको छ । बिवाईडीको गाडीमा लजिष्टिक र म्याग्नुफ्याक्चरर समस्याका कारण अन्र्तर्राष्ट्रिय बजार प्रभावित भइरहेको बेला नेपालमा समेत व्यापारमा धक्का लागि रहेको छ । बिवाईडीको नेपाली बिक्रेता कम्पनी साइमेक्स इंकले भन्सार छलि गर्दैै व्यापार बढाउने रणनीति बाहिरी शतहमा आएसँगै पछिल्लो समय नेपाली बजार प्रभावित हुँदै गइरहेको छ । किलोवाट ढाँटेर विद्युतीय गाडी आयात गरी अर्बौ राजस्व छलि कम्पनीकी संचालक यमुना श्रेष्ठले गरेकी छिन् ।

विद्युतीय तार हार्नेस नेपालमा नपाउँदा ग्राहकले भोग्नु परेको सास्तीको बारे बिवाईडिका सीइओ साहिल श्रेष्ठ र बिक्री प्रबन्धक साइमेक्सकी निर्देशक यमुना श्रेष्ठलाई बुझ्न खोज्दा सम्पर्कमा नै आउन चाहेनन् ।