एनआईसी एशिया बैंकको नाफा १ अर्ब ३८ करोड माथि, ईपीएस कति?
काठमाडौँ । एनआईसी एशिया बैंक लिमिटेडले गत आर्थिक वर्षको चौथो त्रैमासिक वित्तीय विवरण सार्वजनिक गरेको छ । सार्वजनिक विवरण अनुसार कम्पनीको नाफा १ अर्ब ३८ करोड १८ लाख रुपैयाँ रहेको छ । अघिल्लो आर्थिक वर्षमा भने कम्पनीले ४ अर्ब ४४ करोड ४७ लाख रुपैयाँ नाफा गरेको थियो ।
गत वर्ष बैंकको खुद ब्याज आम्दानी १० अर्ब ६१ करोड ७१ लाख रुपैयाँ रहेको छ । जुन अघिल्लो आर्थिक वर्षको सोहि अवधिको भन्दा १३ दशमलव ३९ प्रतिशतले कम हो । अघिल्लो वर्षको सोहि अवधिमा कम्पनीको यस्तो आम्दानी १२ अर्ब २५ करोड ८८ लाख रुपैयाँ थियो ।
यता, गत वर्ष बैंकको कुल सञ्चालन आम्दानी १३ अर्ब १६ करोड ९३ लाख रुपैयाँ रहेको छ । अघिल्लो वर्ष बैंकको यस्तो आम्दानी १५ अर्ब २ करोड ६७ लाख रुपैयाँ थियो ।
बैंकको इम्पेयरमेन्ट चार्ज भने २९३ दशमलव ९७ प्रतिशतले बढेर २ अर्ब ८४ करोड ४३ लाख रुपैयाँ पुगेको छ । यससँगै बैंकको सञ्चालन नाफा ५३ दशमलव ८३ प्रतिशतले घटेको छ । अघिल्लो वर्ष ६ अर्ब ५३ करोड ७६ लाख रुपैयाँ सञ्चालन नाफा गरेको यस बैंकले गत वर्ष ३ अर्ब १ करोड ८१ लाख रुपैयाँ मात्रै सञ्चालन नाफा गरेको छ ।
गत आर्थिक वर्षको असार मसान्तसम्मको अवधिमा बैंकको खराब कर्जा १ दशमलव ७४ प्रतिशत कायम भएको छ । गत वर्ष बैंकको वितरणयोग्य नाफा २ अर्ब ३० करोड ४० लाख रुपैयाँ नोक्सानीमा देखिन्छ । यसै अवधिमा बैंकको प्रतिशेयर आम्दानी (ईपीएस) २९ रुपैयाँ १८ पैसाले घटेर ९ रुपैयाँ २६ पैसा कायम भएको छ भने प्रतिशेयर नेटवर्थ २०२ रुपैयाँ २४ पैसा रहेको छ ।
असार मसान्तसम्म आइपुग्दा बैंकको चुक्ता पूँजी २९ प्रतिशतले बढेर १४ अर्ब ९१ करोड ७५ लाख रुपैयाँ रहेको छ । रिजर्भको आकार २२ दशमलव ८३ प्रतिशतले बढेर १७ अर्ब ५५ करोड ५५ लाख रुपैयाँ पुगेको छ । गत वर्ष बैंकको रिटेन्ड अर्निङमा २ अर्ब ३० करोड ४० लाख रुपैयाँ ऋणात्मक रहेको छ । गत वर्ष बैंकले २ खर्ब ७२ अर्ब ९ करोड ९३ लाख रुपैयाँ कर्जा प्रवाह गरेको छ भने ३ खर्ब ५४ अर्ब ५१ करोड १८ लाख रुपैयाँ निक्षेप संकलन गरेको छ ।
