सातै प्रदेशमा एम्बुलेन्स दिने नेको इन्स्योरेन्सको घोषणा, पहिलो कपिलवस्तुमा हस्तान्तरण
काठमाडौं । सातै प्रदेशमा एम्बुलेन्स दिने नेको इन्स्योरेन्सले घोषणा गरेको छ। केन्द्रीय कार्यालयमा आयोजित एक कार्यक्रममा नेपाल बीमा प्राधिकरणका अध्यक्षसूर्यप्रसाद सिलवालले नेपाल रेडक्रस सोसाइटी, वाणगंगा उपशाखाका सभापति शंकर पाण्डेलाई एम्बुलेन्सको साँचो हस्तान्तरण गरेको हो ।
सो अवसरमा लुम्बिनी प्रदेश सभाका सांसद विष्णु पन्थी, नेपाल प्राधिकरणका निर्देशक सुशीलदेव सुवेदी, कम्पनीका अध्यक्ष रमेश कुमार निरौला तथा प्रमुख कार्यकारी अधिकृत अशोक कुमार खड्काको समेतको उपस्थिति रहेको थियो।
कम्पनीले सामाजिक उत्तरदायित्व अन्तर्गत उक्त एम्बुलेन्स हस्तान्तरण गरिएको हो । कम्पनीले ब्यवसायको साथसाथै समाज सेवाको लागि समय सयमा विभिन्न सामाजिक उत्तरदायित्व सम्बन्धी कार्यक्रमहरु पनि गर्दै आएको कम्पनीले जनाएको छ।
यस अघि सिराहाको सामुदायिक अस्पताललाई यन्त्र– उपकरणको लागि सहयोग, बन्दीपुर– तनहुँको सामुदयिक अस्पतालको भवन निर्माणको लागि सहयोग प्रदान गरेको थियो ।
यसै क्रममा कम्पनीले लुम्बिनी प्रदेश अन्तर्गत रहेको नेपाल रेडक्रस सोसाइटी, वाणगंगा उपशाखा, कपिलवस्तुलाई संस्थागत सामाजिक उत्तरदायित्व अन्तर्गत एम्बुलेन्स सौजन्य स्वरुप प्रदान गरेको छ ।
कम्पनीले विगतका बर्षहरु देखि नै आफ्नो सेवा प्रवाहका क्षेत्रमा निरन्तर बृद्धि गर्दै बीमाशुल्क, दावी भुक्तानी, रोजगारीको अवसर, नेपाल सरकारलाई कर भुक्तानी लगायतका सूचकांकहरुमा उल्लेखनीय बृद्धि गर्दै आएको छ ।
