२०५१ सालदेखि बीमा नियमनको भूमिका निभाएर विदा भइन् सहायक निर्देशक सुनिता कार्की

नेपालले २०५१ सालमा लिएको आर्थिक उदारिकरण सँगै बीमा व्यवसायमा समेत नीजि क्षेत्रले चहलपहल सुरु गर्दा सुनिता कार्की तत्कालिन बीमा समितिमा प्रवेश गरेकी थिइन् । २०५१ सालमा पहिलो लटमा कर्मचारी भर्ना हुनेको सूचिमा थिइन् सुनिता कार्की ।

नेपालमा भर्खरै निजि क्षेत्र अघि बढेको र सो वेला बीमा क्षेत्र बामे सर्दै गरेको  अवस्थामा थियो । बीमा क्षेत्र विस्तारको पहिलो चरणमा कार्कीले करिअर सुरुवात गरेर आजको अत्याधुनिक बीमा सेवामा समेत प्रभावकारी नियमन गरेर ३० वर्षे सेवा अवधी पुरा गरेर विदा भएकी छिन् ।

सर्वप्रथम त नियुक्ति लिएपछि बीमा बुझ्न धेरै नै समय लागेको उनी बताँउछिन् । काम गर्दै सिक्दै आज यो स्थानसम्म आइपुग्दा आफूलाई र बीमा प्राधिकरणलाई आकाश जमिनको फरक रहेको वृतान्त उनी सुनाँउछिन् ।

सहायक पदबाट बीमा समितिमा प्रवेश गरेर सहायक प्रथम हुँदै आजको सहायक निर्देशकसम्म बीमा प्राधिकरणमा तय गरेको यात्रालाई अविस्मरणीय रुपमा उनी सम्झन चाहन्छिन् । यो यात्रामा बिट मार्दै नयाँ पींढिलाई जिम्मेवारी हस्तान्तरण गरेर जान पाउदा निकै खुसी भएको उनी सुनाउछिन् । खासमा उनी उप निर्देशकसम्म हुनुपर्ने थियो । तर, उनको यात्रा सहायक निर्देशकबाटै टुंगिएको छ ।

कार्कीले २०५१ साल असार १ गते तत्कालिन बीमा समितिमा नियुक्ती पत्र लिएर काम सुरु गरेकी थिइन् । सो समय सरकारी जागिरमा प्रवेश गर्न त्यत्ति सजिलो भने थिएन । बीमा समिति आफैले विज्ञापन खुलाई परिक्षा लिने गर्दथ्यो । लिखित परिक्षा र अन्तर्वार्ता दुवै समितिले नै लिने गरेको कार्कीले बताइन् । २०५१ सालमा उनी सहित ५ जनाले समितिमा प्रवेश गरेका थिए ।

उनले समितिमा प्रवेश गरेको समयमा कर्मचारी एकदमै थोरै थिए । खासमा नियमन गर्नुपर्ने कम्पनीको संख्या पनि थोरै थियो । यसले गर्दा हरेक कर्मचारीले २÷३ वटा विभागको काम सम्हाल्नु पर्दथ्यो । उक्त समय महिला कर्मचारीको संख्या नगन्य नै थियो । महिला कर्मचारी नै भएको कारण विभेदपूर्ण वातावरण भने उनले कहिल्यै महसुस गर्नु परेन ।

उनले जागिर सुरु गरेदेखि अवकाश लिने बेलासम्ममा करिब ५ जना अध्यक्षले कार्यभार सम्हाले । सबै अध्यक्षको कार्यकालमा काम गर्ने वातावरणमा खासै फरक नभएको सुनिताको अनुभव रहेको छ ।

तत्कालिन समयमा समितिको आकार सानो थियो, कर्मचारी पनि थोरै थिए भने चूनौती पनि थोरै नै थियो भने आज बीमा प्राधिकरणको रुपमा एक विशाल र देशकै सशक्त नियामक निकायको रुपमा सयौं कर्मचारीहरुसहित स्थापित भइसकेको छ । बीमाको जोखिम र दायरा साँघुरो बेलादेखि आजसम्म आइपुग्दा बीमा क्षेत्रमा आफूले धेरै कुराहरु सिक्ने मौका पाएको सुनिता कार्कीको अनुभव छ ।

सरकारीस्तरबाट सञ्चालन भएतापनि सुरुवाती अवस्थामा प्राधिकरण भाडाको भवनमा बसेको थियो । कपनको कार्यालयमा केही सहज भएपनि अहिले अहिले प्राधिकरणको आफ्नै भवन निर्माण भइरहेकोले यसलाई उपलब्धिको रुपमा लिन्छिन् उनी । साथै समिति प्राधिकरणमा परिणत हुनु र यसको कार्यक्षेत्र थप फराकिलो हुनुलाई पनि उपलब्धिको रुपमा हेर्छिन् ।

बीमा समिति हुँदै प्राधिकरणको सहायक निर्देशकसम्मको यात्रामा आइपुग्दा सहयोग गर्नुहुने, पूर्व अध्यक्षहरु, पूर्व कार्यकारी निर्देशकहरु, निर्देशकहरु, उप निर्देशकहरु सबैमा धन्यावाद तथा आभार व्यक्त गरेकी छन् । साथै आगामी दिनमा बीमा क्षेत्रमा अझै केही गर्ने सोचका साथ अझै उत्साह नहराएको भूतपूर्व सहायक निर्देशक सुनिता कार्की आफ्नो अनुभव सुनाउँछिन् ।