नेपाल टेलिकमको नाफा साढे पाँच अर्ब, कस्ता छन् अन्य सूचक ?
काठमाडौं । नेपाल दूरसञ्चार कम्पनी लिमिटेड (नेपाल टेलिकम) ले चालु आर्थिक वर्षको तेस्रो त्रैमासम्मको वित्तीय विवरण सार्वजनिक गरेको छ । कम्पनीले सार्वजनिक गरेको विवरण अनुसार मुनाफामा सुधार देखिएको हो ।
चालु आर्थिक वर्षको तेस्रो त्रैमासमा कम्पनीले ५ अर्ब ५९ करोड ३७ लाख रुपैयाँ खुद नाफा कमाएको छ । जुन गत आर्थिक वर्षको सोहि तुलनामा कम्पनीको नाफा ३.३५ प्रतिशतले ले धेरै हो । गत वर्षको सोहि अवधिमा कम्पनीको नाफा ५ अर्ब ४१ करोड १९ लाख रुपैयाँ रहेको थियो ।
चैतसम्म आइपुग्दा कम्पनीको सञ्चालन आम्दानी २५ अर्ब ४८ करोड रुपैयाँ पुगेको छ । गत आर्थिक वर्ष भने कम्पनीले २७ अर्ब ३४ करोड रुपैयाँ सञ्चालन आम्दानी गरेको थियो । वित्तीय आम्दानी पनि ५ अर्ब ७० करोडबाट घटेर ५ अर्ब १८ करोड रुपैयाँमा झरेको छ ।
समिक्षा अवधिमा अन्य श्रोतबाट हुने आम्दानी भने १६ करोड ११ लाखबाट बढेर ५३ करोड, चुक्ता पुँजी १८ अर्ब रुपैयाँ, रिजर्भ कोषमा ७४ अर्ब ३३ करोड रुपैयाँ रहेको छ ।
कम्पनीको ४० रुपैयाँ ९ पैसा रहेको प्रतिसेयर आम्दानी अहिले बढेर ४१ रुपैयाँ ४४ पैसा कायम भएको छ । यसको प्रतिसेयर नेटवर्थ भने ५१२ रुपैयाँ ९९ पैसा रहेको छ ।
