ऐतिहासिक उचाइतिर शेयर बजार : नेप्से ३ हजारमाथि, कारोबार साढे ११ अर्ब माथि
काठमाडौं । शेयर बजार मापक सूचक नेप्सेले हालसम्मकै उच्च बिन्दु कायम गरेको छ । मंगलबार नेप्से दोहोरो अंकले बढेर ३१११.०९ बिन्दुमा पुगेको हो । यो हालसम्मकै उच्च अंक हो ।
यसभन्दा अघि साउन १३ गते बुधबार नेप्से ३०९४.९४ बिन्दुको रेकर्ड कायम रहेको थियो । आज नेप्से परिसूचक २६.०२ अंकले बढेर हालसम्मकै उच्च विन्दु कायम गरेको हो ।
मंगलबार पूँजी बजारमा बजारमा २२३ कम्पनीको २ करोड ११ लाख २९ हजार ८८ कित्ता शेयर किनबेच हुँदा ११ अर्ब ५२ करोड ९२ लाख १७ हजार ७७४ रुपैयाँको कारोबार भएको छ ।
त्यस्तै, आज हाइड्रोपावर र लघुवित्तमा लगानीकर्ताहरु झुम्मिएका छन् । सर्वाधिक कारोबार हुने कम्पनीमा अपि पावर रहेको छ । कम्पनीको आज ४६ करोड ८२ लाख १७ हजार ९० रुपैयाँको कारोबार भएको हो ।
त्यस्तै, आज २ कम्पनीको शेयरमा पाजेटिभ सर्किट लागेको छ भने ५ कम्पनीको सर्किट लेभलमा कारोबार भएको छ ।
