नेपाल क्लियरिङ्ग हाउसको १२ औं वार्षिक साधारण सभा सम्पन्न, ३०% लाभांश पारित
काठमाडौं । नेपाल क्लियरिङ्ग हाउस लिमिटेडले १२ औं वार्षिक साधारण सभा मंसिर १७ गते र्याडिसन होटेल, काठमाडौमा सम्पन्न गरेको छ । लिमिटेडको उक्त सभाले ३० प्रतिशत लाभांश दिने निर्णय पारित गरेको हो ।
बैठकले २८.५% बोनस शेयर र बोनस शेयरको कर प्रयोजनका निम्ती १.५% नगद लाभांश वितरण गर्ने निर्णय गरेको छ । यस पश्चात एनसीएचएलको चक्ता पुँजी एक अर्ब ६६ लाख ३७ हजार नौ सय रुपैयाँ बराबरको हुनेछ । साथै बैठकले अधिकृत पूँजी वृद्धि गरी २ अर्ब रुपैयाँ पु¥याउन स्वीकृत गरेको छ ।
कम्पनीले पूँजी वृद्धी मार्फत नेशनल पेमेन्ट स्वीचमा लगानी गर्नुका साथै नेशनल तथा क्रस बोर्डर कारोबारका लागि थप भुक्तानी प्रणाली पूर्वाधार विकास तथा विस्तार गर्ने र जोखिम व्यवस्थापनलाई सुढृढ बनाउनका लागि उक्त पूँजी प्रयोग गर्ने जनाएको छ ।
साधारण सभाको बैठकले कम्पनीको शेयर स्वामित्व संरचनामा साविक झैं नेपाल राष्ट्र बैंक र बैंक वित्तीय संस्थाहरु मात्र कायम रहने गरीे गाभ्न÷गाभिन वा प्राप्त गर्न सञ्चालक समितिलाई अख्तियारी प्रदान गरेको छ । त्यस्तै एनसीएचएलले वित्तीय तथा भुक्तानी सम्बन्धी प्रविधिमा अनुसन्धान लगायत प्रविधि र सफ्टवेयरको विकास समेत गर्ने उद्देश्य सहित कम्पनीको सहायक कम्पनीको रुपमा छुट्टै पब्लिक लिमिटेड कम्पनी खोल्ने सम्बन्धमा सम्भाव्यता अध्ययन गर्नेछ ।
आ.व. २०७९।८० मा कम्पनीबाट फर्छ्योट भएका कारोबारहरुको संख्या १६% ले बृद्धि भएसँगै कम्पनीको खुद नाफा ६% ले वृद्धी भएको छ । सो आर्थिक वर्षमा एनसीएचएलको भुक्तानी प्रणालीहरु मार्फत कुल १४१ खर्ब बराबरको ८.१९ करोड भुक्तानी कारोबारहरु राफसाफ गरेको थियो ।
एनसीएचएलमा नेपाल राष्ट्र बैंकको १०% र बैंक तथा वित्तीय संस्थाहरुको ९०% स्वामित्व रहेको छ । एनसीएचएलको सञ्चालक समितिमा नेपाल राष्ट्र बैंकको १ जना, वाणिज्य बैंकहरुबाट ३ जना, विकास बैंक, फाइनान्स कम्पनीबाट र स्वतन्त्र निर्देशक गरी क्रमशः १–१ जना रहेका छन् ।
