तिनकुने घटनामा पौने ५ करोड रुपैयाँको बीमा दावी, कुन कम्पनीको कति ?

काठमाडौं । चैत १५ गते काठमाडौं उपत्यकामा भएको तिनकुने घटनामा पौने पाँच करोड रुपैयाँ बीमा दावी परेको छ । नेपाल बीमा प्राधिकरणले बिहीबार सार्वजनिक गरेको विवरण अनुसार नेपालमा सञ्चालित रहेका ११ निर्जीवन बीमा कम्पनीमा चार करोड ८७ लाख रुपैयाँ ६८ हजार रुपैयाँ बराबरको बीमा दावी परेको देखिएको हो ।
सरकारी स्वामित्वको राष्ट्रिय बीमा कम्पनीमा सबैभन्दा बढी रुपैयाँको दावी परेको छ । प्रकाशित विवरण अनुसार कम्पनीमा एक करोड २७ लाख रुपैयाँका दुई वटा बीमा दावी परेका छन् ।
त्यस्तै सिद्धार्थ प्रिमियर इन्स्योरेन्समा ८ वटा बीमा दावी बराबर एक करोड १७ लाख ५० हजार रुपैयाँको बीमा दावी परेको छ भने सगरमाथा लुम्बिनी इन्स्योरेन्समा ५ वटा बीमा दावी बराबर ६८ लाख ९१ हजार रुपैयाँको बीमा दावी परेको छ ।
नेपाल बीमा प्राधिकरणका अनुसार नेको इन्स्योरेन्समा ४ वटा बीमा दावी बराबर ५२ लाख रुपैयाँ, द ओरियण्टल इन्स्योरेन्समा १ दावी बराबर ४७ लाख ५० हजार रुपैयाँ, नेशनल इन्स्योरेन्समा ११ वटा दावी बराबर २० लाख ७५ हजार रुपैयाँको बीमा दावी परेको छ ।
साथै हिमालयन एभरेष्ट इन्स्योरेन्समा १६ लाख ९५ हजार रुपैयाँ, आइजिआई प्रुडेन्सियल इन्स्योरेन्समा १४ लाख ६० हजार रुपैयाँ, शिखर इन्स्योरेन्समा १३ लाख २५ हजार रुपैयाँ, नेपाल इन्स्योेरेन्समा आठ लाख ७१ हजार रुपैयाँ र प्रभु इन्स्योरेन्समा सबैभन्दा कम अर्थात ५० हजार रुपैयाँको मात्र बीमा दावी परेको विवरणले देखाएको छ । नेपालमा सञ्चालित १४ निर्जीवन बीमा कम्पनीहरुमध्ये ३ वटा कम्पनीमा हालसम्म कुनै पनि प्रकारको बीमा दावी नपरेको विवरणले उल्लेख गरेको छ ।
बीमा दावी भुक्तानीको सन्दर्भमा शिखर इन्स्योरेन्स जहिल्यै अघि रहेको देखिन्छ । कम्पनीले गत असोजमा गएको बाढी पहिरोमा पनि सबैभन्दा अघि बीमा दावी भुक्तानी गरेर बीमा दावी भुक्तानीमा आफुलाई अब्बल रुपमा प्रस्तुत गरेको थियो । सोही शिखर इन्स्योेरेन्सले तीन कुने घटनामा पनि तीन वटा बीमा दावी बराबर ४५ हजार रुपैयाँ भुक्तानी गरीसकेको छ ।
तीनकुने घटनाले आम नागरिका निजी सम्पत्ति, सवारी साधन तथा विभिन्न व्यवसायहरुमा आगजनी भएपछि सम्बन्धित बीमितहरुले आफ्नो दावी भुक्तानी माग गरेका छन् । दावी परेपछि कम्पनीहरुले सर्भेयर पठाएर क्षतिको विवरणसहितको प्रतिवेदन पेश गरेको खण्डमा कम्पनीले बीमा दावी भुक्तानी गर्ने प्रावधान रहेको छ ।
चैत १५ गते राजाबादी आन्दोलनकारीहरुले गरेको आगजनी, तोडफोडले गर्दा निर्जीवन बीमा कम्पनीहरुमा करोडौं रुपैयाँको बीमा दावी परेको छ । नेपाल प्रहरीले उत्तेजित प्रदर्शनकारीलाई समयमै नियन्त्रण तथा शान्त गर्न नसक्दा झनै घटनाले उग्र रुप लिएको थियो । जसका कारण बीमा कम्पनीमा पर्ने दावी बढ्न पुगेको जानकार बताउछन् ।