विश्व बजारमा बिवाईडीको तहल्काः गाडी बिक्रीमा टेस्लालाई उछाल्दै, प्रविधिमा समेत अग्रस्थानमा

काठमाडौं ।चिनियाँ विद्युतीय गाडी निर्माता बिवाईडीले २०२५ को पहिलो त्रैमासिक अवधिमा आफ्नो बिक्रीमा ६० प्रतिशतको उल्लेखनीय वृद्धि हासिल गरेको छ। यसले प्रमुख प्रतिस्पर्धी टेस्लालाई उछाल्दै एक नयाँ ऐतिहासिक माइलस्टोन प्राप्त गरेको छ। बिवाईडीले २०२५ को पहिलो तीन महिनामा १० लाख १ हजार भन्दा बढी नयाँ उर्जाका सवारीसाधन बिक्री गरेको हो, जसमा ब्याट्रीबाट चल्ने गाडी, हाइब्रिड सवारी साधन र व्यावसायिक गाडीहरू समावेश छन्। यस अवधिमा विद्युतीय गाडीहरूको बिक्री मात्रै ४ लाख १६ हजारभन्दा बढी पुगेको छ, जुन अघिल्लो वर्षको तुलनामा ३९ प्रतिशतले वृद्धि हो।

बिवाईडीले अटो बजारमा आफ्नो हिस्सा बढाउँदै गएको बेला टेस्ला भने कमजोर देखिएको छ ।  टेस्लाको बिक्री अघिल्लो वर्षको तुलनामा ओरालो लागेको छ । यसको २०२४ को कुल आम्दानी ९७.७ अर्ब डलरमा सीमित रह्यो। जबकि बिवाईडीको वार्षिक आम्दानी १०७ अर्ब डलर रहेको छ, जुन यसका लागि एक ऐतिहासिक र नयाँ सफलता हो। यसैको परिणामस्वरूप बिवाईडीले आफ्नो प्रतिस्पर्धी टेस्लालाई पछाडि पार्दै बजारमा अग्रणी स्थानमा कब्जा गर्दैछ।

विशेषत: बिवाईडीको विद्युतीय गाडीहरूको बिक्री वृद्धिले यसको ब्रान्डको विश्वव्यापी प्रभावलाई मज़बूत बनाएको छ। कम्पनीले नयाँ प्रविधिहरू र बृहत् उत्पादन क्षमताको साथ प्रतिस्पर्धी मूल्यमा गाडी उपलब्ध गराएर विश्व बजारमा आफ्नो स्थानलाई सुदृढ पारेको छ। यो वृद्धि कम्पनीको दीर्घकालिक रणनीतिका लागि अत्यन्त महत्वपूर्ण छ, जसले यसलाई भविष्यमा अझ धेरै मार्केट हिस्सेदारी हासिल गर्नको लागि सक्षम बनाउनेछ।

यसको अलावा बिवाईडीले विद्युतीय गाडीहरूको चार्जिंग प्रविधिमा पनि नयाँ क्रान्ति ल्याउने तयारी गरेको छ। कम्पनीले ५ मिनेटमै गाडीको ब्याट्री चार्ज गर्ने नयाँ प्रविधि विकसीत गरेको जानकारी दिएको छ, जुन विद्युतीय गाडी उद्योगको लागि एक महत्वपूर्ण कदम हुनेछ। यो प्रविधि गाडी प्रयोगकर्ताहरूको लागि ठूलो फाइदा हुनेछ र विद्युतीय गाडीको मुख्य समस्याहरूलाई समाधान गर्न सघाउनेछ, जसले कम्पनीलाई भविष्यमा अझ ठूलो सफलता दिलाउने सम्भावना राख्दछ।

अन्तर्राष्ट्रिय बजारमा बिवाईडीको विस्तार

गत वर्ष बिवाईडीका गाडीहरू मुख्य रूपमा चीनकै ग्राहकहरूलाई आपूर्ति गरिएका थिए । कुल बिक्रीको मात्र १० प्रतिशत मात्रै अन्तर्राष्ट्रिय बजारमा निर्यात भएको थियो । तर, विश्लेषकहरू बिवाईडीको वृद्धिको सम्भावनामा आशावादी छन्, किनकि कम्पनीले युरोप, दक्षिणपूर्वी एशिया तथा दक्षिण अमेरिकी बजारहरूमा विस्तार गरिरहेको छ ।

युरोपमा बिवाईडीले दुईवटा उत्पादन कारखाना स्थापना गरिरहेको छ, जबकि टेस्ला त्यहाँ बिक्री घट्दै गएको चुनौती झेलिरहेको छ । गत फेब्रुअरीमा टेस्लाको यूरोपियन बजारमा बिक्री करिब ४० प्रतिशतले घटेको थियो ।

गत हप्ता, बिवाईडी का संस्थापक तथा सीईओ वाङ चुवानफुले कुल बिक्री ३० प्रतिशतले बढाउने लक्ष्य लिएको र अन्तर्राष्ट्रिय डेलिभरी ८ लाखभन्दा बढी पु¥याउने योजना बनाएको बताएका थिए ।

नवप्रवर्तनमा बिवाईडीको अग्रसरता

बिवाईडीले पछिल्लो त्रैमासिक अवधिमा धेरै नयाँ प्रविधिहरू सार्वजनिक गरेको छ । मार्च महिनामा कम्पनीले नयाँ ब्याट्री चार्जिङ प्रविधि सार्वजनिक ग¥यो, जसले ५ मिनेटमै २५० माइलको दायरा प्रदान गर्न सक्ने दाबी गरिएको छ । यो टेस्लाको सुपरचार्जर भन्दा अगाडि रहेको छ, जसले १५ मिनेटमा २०० माइलको दायरा मात्र थप्न सक्छ ।

फेब्रुअरीमा, बिवाईडीले उन्नत चालक सहायता प्रणाली सार्वजनिक ग-यो, जुन टेस्लाको फुल सेल्फ ड्राइभिङ सिस्टमको प्रतिस्पर्धी हो । अझ रोचक कुरा बिवाईडीले यसलाई आफ्ना अधिकांश मोडेलहरूमा निःशुल्क उपलब्ध गराउने घोषणा गरेको छ।

बिवाईडीको सवारीसाधनहरू हालसम्म अमेरिकी बजारमा प्रवेश गर्न सकेका छैनन् । चिनियाँ ईभीहरूमा १०० प्रतिशत आयात कर लगाइएको छ । तर, चीनकै बजारमा भने बिवाईडीले टेस्लालाई चुनौती दिइरहेको छ । २०२५ को पहिलो दुई महिनामा चीनमा बिवाईडीका नयाँ–ऊर्जा यात्री सवारीसाधनको बिक्री २५ प्रतिशतले बढेर बजारमा २७ प्रतिशत हिस्सा ओगटेको छ । तर, टेस्लाको बिक्री १४ प्रतिशतले घटेको छ, जसले गर्दा यसको बजार हिस्सा ४ प्रतिशतमा खुम्चिएको छ।

गत महिना, बिवाईडीकी कार्यकारी उपाध्यक्ष स्टेला लीले जर्मन अटो पत्रिकालाई दिएको अन्तर्वार्तामा हंगेरी र टर्कीमा कारखाना सञ्चालन गरिसकेको बिवाईडीले तेस्रो कारखाना निर्माण गर्ने सम्भावना खोजिरहेको बताएकी थिइन् ।

गाडी उद्योगमा मर्जरको लहर

चीनको मोटर उद्योगमा कम्पनीहरूबीच एकीकरण हुने क्रम बढ्दै गएको छ। हालै, चीनका दुई ठूला कार निर्माता कम्पनीहरू डोंगफेङ मोटर र चाङ्गन अटोमोबाइल मर्जर वार्तामा रहेको समाचार बाहिरिएको छ । यी दुवै कम्पनी फोर्ड र निसानका चिनियाँ साझेदार हुन् । चिनियाँ सरकारी सञ्चारमाध्यमका अनुसार यी कम्पनीहरू अन्य राज्य–नियन्त्रित संस्थाहरूसँग पुनःसंरचनाबारे छलफल गरिरहेका छन् । यदि यो मर्जर सफल भएमा, चीनकै सबैभन्दा ठूलो गाडी कम्पनी निर्माण हुन सक्छ, जसले विश्वभरि पाँचौं ठूलो कार निर्माता को स्थान ओगट्न सक्छ।

बिवाईडीको बिक्री वृद्धिले यसलाई टेस्लाको प्रमुख प्रतिस्पर्धीको रूपमा उभ्याइरहेको छ। नवप्रवर्तन, अन्तर्राष्ट्रिय विस्तार र प्रतिस्पर्धात्मक मूल्य निर्धारणका कारण बिवाईडीले विद्युतीय सवारी बजारमा बलियो उपस्थिति बनाउँदै लगेको देखिन्छ । तथापि, अन्तर्राष्ट्रिय बजारमा ब्रान्ड पहिचान र व्यापार नीतिका चुनौतीहरू सामना गर्नुपर्ने देखिन्छ ।

नेपाली अटो बजारमा बिवाईडीका गाडीहरू चाँडै नै लोकप्रियता हासिल गर्दैछन्, विशेषगरी अटो थ्रि र डल्फिन मोडेलहरूले ग्राहकहरूको ध्यान आकर्षित गरेका छन्। कम्पनीले नेपाली बजारमा आफ्नो गाडीहरूको विविधता र प्रतिस्पर्धी मूल्यका साथ प्रवेश गर्दा यसले स्थानीय प्रतिस्पर्धीहरूलाई कडा चुनौती दिइरहेको छ। बिवाईडीको उत्कृष्ट गाडी डिजाईन, ऊर्जा दक्षता र नवीनतम प्रविधिहरूले ग्राहकहरूलाई आकर्षित गर्न सफल भएको छ। हुन्डाई, टाटा र सुजुकी जस्ता स्थापित ब्रान्डहरूले बिवाईडीसँग प्रतिस्पर्धा गर्नमा कठिनाइ महसूस गरेका छन्, किनकि बिवाईडीले नेपालको बजारमा आफ्नो स्थान पक्का गरेको छ र यसको गाडीहरूले ठूलो हिस्सा ओगटेको छ। यसका साथै, बिवाईडीले गाडीको चार्जिंग प्रविधि र किफायती मूल्यका कारण ग्राहकहरूका लागि आकर्षक विकल्प प्रस्तुत गरेको छ, जसले यसको वृद्धिलाई अझ तीव्र बनाएको छ।