काठमाडौंको विषाक्त हावा : विश्वकै दोश्रो प्रदूषित सहर, स्वास्थ्यमा गम्भीर असर
काठमाडौं । काठमाडौं उपत्यकाको वायु प्रदूषण फेरि पनि गम्भीर रूपमा वृद्धि भएको छ। आजको ‘एयर क्वालिटी इन्डेक्स’ अनुसार काठमाडौं विश्वमै दोस्रो स्थानमा पुगेको छ।
हिजो प्रदूषणको हिसाबले पहिलो स्थानमा रहेको काठमाडौं आज दोस्रो स्थानमा झरेको छ भने भारतको राजधानी नयाँ दिल्ली पहिलो स्थानमा उक्लिएको छ। काठमाडौं उपत्यकाको एक्यूआई सूचकांक आज २४९ पुगेको छ भने दिल्लीको वायु प्रदूषण ३५३ एक्यूआईमा मापन गरिएको छ।
तेस्रो स्थानमा भने पाकिस्तानको लाहोर रहेको छ, जहाँको एक्यूआई १७८ छ।
विशेषज्ञहरूका अनुसार लामो समयदेखि पानी नपर्नु, उपत्यकाको आकाशमा धुलोको मात्रा अत्यधिक बढ्नु, साथै आसपासका जंगलमा लागेको डढेलोको धुँवाले वायु प्रदूषणको अवस्था थप गम्भीर बनेको हो।
वातावरण विभागका मापदण्डअनुसार, ०–५० एक्यूआई सुरक्षित मानिन्छ, ५१–१०० मध्यम, १०१–१५० अस्वस्थ, १५१–२०० झनै अस्वस्थ, २०१–३०० निकै अस्वस्थ, र ३०१ भन्दा माथि खतरनाक तहमा पुग्ने जनाइएको छ।
विशेषज्ञहरूले अत्यधिक प्रदूषणको अवस्थामा स्वास्थ्य सुरक्षाका उपाय अपनाउन सुझाव दिएका छन्। मास्कको प्रयोग, घरबाहिर कम निस्कनु र वायु शुद्धीकरण उपाय अवलम्बन गर्न नागरिकहरूलाई आग्रह गरिएको छ।
