शङ्कास्पद कारोबार २४ प्रतिशतले बढ्यो, यस्तो छ राष्ट्र बैंकको वार्षिक प्रतिवेदन
काठमाडौं । नेपाल राष्ट्र बैंकको वित्तीय जानकारी इकाईले आर्थिक वर्ष २०८०/८१ को वार्षिक प्रतिवेदन सार्वजनिक गरेको छ। प्रतिवेदनमा इकाईको वार्षिक गतिविधि तथा नेपालको सम्पत्ति शुद्धीकरण निवारण प्रणालीसम्बन्धी विवरण समेटिएको छ।
उक्त प्रतिवेदनअनुसार, सम्पत्ति शुद्धीकरण तथा आतङ्ककारी क्रियाकलापमा वित्तीय लगानी निवारणका लागि मनी लाउन्डरिङ निवारण ऐन, २०६४ बमोजिम रिपोर्टिङ्ग गर्ने सूचक संस्थाहरू, अनुसन्धान निकायहरू र नियामक निकायहरूको सङ्ख्या १,६३९ पुगेको छ। यस अवधिमा सूचक संस्थाहरूले इकाईमा पेस गरेको सीमा कारोबारको सङ्ख्या १६,९७,७१२ रहेको छ।
शङ्कास्पद कारोबार तथा गतिविधि प्रतिवेदन २४ प्रतिशतले वृद्धि भई ७,३३८ पुगेको छ, जसमा कर छली, मौद्रिक अपराध, बैंकिङ्ग अनियमितता, विदेशी विनिमय दुरुपयोग, बीमा तथा सहकारीमा अनियमितता, ठगी, चिट्ठा, जुवा तथा सट्टेबाजी जस्ता विषय समेटिएका छन्। विश्लेषण भएका १,६३२ मध्ये ८८९ प्रतिवेदन अनुसन्धानका लागि सम्बन्धित निकायहरूमा पठाइएको छ भने ७४६ प्रतिवेदनलाई भविष्यमा थप जानकारीका लागि अभिलेखीकरण गरिएको छ।
सन् २०२३ मा नेपालको तेस्रो चरणको पारस्परिक मूल्याङ्कन सम्पन्न भई नेपाललाई वित्तीय कारवाही कार्यदल (एफएटिएफ) ले थप अनुगमन सूचीमा राखेपछि सो सूचीबाट बाहिरिन चालिएका प्रयासहरू प्रतिवेदनमा उल्लेख गरिएको छ। इकाईले सम्पत्ति शुद्धीकरण तथा आतङ्ककारी गतिविधिसम्बन्धी राष्ट्रिय तथा अन्तर्राष्ट्रिय समन्वयका प्रयासहरू समेत प्रस्तुत गरेको छ।
यसका साथै, प्रतिवेदनमा हुण्डी, साइबर ठगी, अनलाइन अवैध खेल, अभौतिक सम्पत्ति दुरुपयोग, कर छली, भ्रष्टाचार तथा आयात–निर्यात प्रक्रियामा हुने सम्पत्ति शुद्धीकरण जस्ता प्रवृत्तिहरूबारे विस्तृत विवरण समेटिएको छ।
