सुधारिदो म्युचुअल फण्डको वित्तीय अवस्थाः ३९ फण्डको नाफा बढ्यो, बजार लगानी र न्याभ कस्को कति ?
काठमाडौँ । फागुन म्युचुअल फण्डको व्यापारमा समेत सुधार आएको छ । शेयर बजारमा आएको उतार चढाबकाबीच म्युचुअल फण्डको लगानी, नाफा र न्याभमा समेत बदलाभ आएको हो ।
फागुन महिनाको अन्त्यसम्म शेयर बजारमा सुधार देखिएको छ, जसका कारण म्युचुअल फण्डहरूको नाफामा सकारात्मक प्रभाव परेको छ । माघको अन्तिम कारोबार दिन २६८५ विन्दुमा रहेको नेप्से परिसूचक फागुन मसान्तसम्म २७१८ विन्दुमा पुगेपछि बजार १.२३ प्रतिशतले वृद्धि भएको छ ।
हाल सञ्चालनमा रहेका ४३ वटा म्युचुअल फण्डले फागुन महिनासम्म ४ अर्ब ९२ करोड २६ लाख रुपैयाँ खुद नाफा कमाएका छन्, जुन माघ महिनाको तुलनामा २७.६५ प्रतिशत कम हो । माघमा यी फण्डहरूले ३ अर्ब ८५ करोड ६४ लाख रुपैया नाफा कमाएका थिए ।
फागुन महिनासम्ममा सर्वाधिक नाफा कमाउनेमा सिद्धार्थ इक्विटी फण्ड रहेको छ । फण्डले २५ करोड १३ लाख रुपैयाँ नाफा कमाएको छ । यो नाफा अघिल्लो महिनाको तुलनामा १६.०८ प्रतिशत बढी हो ।
त्यस्तै, दोस्रो नम्बरमा रहेको प्रभु सेलेक्ट फण्डले २५ करोड ४ लाख रुपैयाँ, ग्लोबल आइएमई ब्यालेन्स्ड फण्ड–१ ले २१ करोड ९१ लाख, नबिल ब्यालेन्स्ड फण्ड–३ ले २० करोड ३० लाख, हिमालयन ८०–२० ले २० करोड १७ लाख र एनआइबीएल सहभागिता फण्डले २० करोड १ लाख रुपैयाँ नाफा कमाएको छ ।
सर्वाधिक नाफा बृद्धि गर्नेमा भने सनराइज ब्लुचिप फण्ड पहिलो नम्बरमा रहेको छ । फण्डको नाफा ५८१.९२ प्रतिशतले बृद्धि भएको छ ।
शेयर बजारमा लगानीको आकार समेत घढ्यो
पुँजी बजारमा देखिएको सुधारका कारण अधिकांश म्युचुअल फण्डहरूले आफ्नो लगानी बढाएका छन् । फागुन महिनासम्म ४३ म्युचुअल फण्डहरूको कुल ४२ अर्ब २० करोड ९५ लाख ६२ रुपैयाँ लगानी गरेका हुन् ।
जुन माघको तुलनामा ३.३५ प्रतिशतले बढी हो । माघमा फण्डहरूको बजारमा लगानी ४० अर्ब ८४ करोड २९ लाख रुपैयाँ रहेको थियो । यसअवधिमा ९ फण्डले शेयर बजारमा लगानी घटाएका छन् भने बाँकीको वृद्धि भएको छ ।
फागुन महिनामा एनआईबिएल सहभागिता फण्डले लगानी २.६० प्रतिशतले बढाएर ४ अर्ब ३३ करोड ५ लाख रुपैयाँ पुराएको छ । एनएमबि सरल बचत खाता–ई ले २ अर्ब ४९ करोड, सिद्धार्थ इक्वाटी फण्डले १ अर्ब ४६ करोड, प्रभु सेलेक्ट फण्डले १ अर्ब ३० करोड रुपैयाँ शेयर बजारमा लगानी गरेका हुन् ।
फण्डहरूको न्याभमा कस्तो ?
फागुन महिनाको अन्त्यसम्म अधिकांश म्युचुअल फण्डहरूको न्याभ वृद्धि भएको छ भने दुई फण्डको मात्र न्याभ घटेको छ । तथ्यांकअनुसार सात वटा फण्डको न्याभ १२ रुपैयाँभन्दा माथि पुगेको छ भने २५ वटा फण्डको न्याभ ११ रुपैयाँभन्दा बढी रहेको छ ।
फागुन मसान्तसम्म सबैभन्दा उच्च न्याभ एनएमबी सुलभ इन्भेष्टमेन्ट फण्ड–२ को रहेको छ, जसको न्याभ १२.६४ रुपैयाँ पुगेको छ ।
त्यस्तै, प्रभु स्मार्ट फण्डको न्याभ १२.६३ रुपैयाँ, हिमालयन ८०.२० को १२.५१ रुपैयाँ, प्रभु सेलेक्ट फण्डको १२.५१ रुपैयाँ, ग्लोबल आइएमई ब्यालेन्स्ड फण्ड–१ को १२.२१ रुपैयाँ, सिद्धार्थ इन्भेष्टमेन्ट ग्रोथ स्किम ३ र २ को क्रमशः १२.१५ रुपैयाँ र १२.०४ रुपैयाँ पुगेको छ ।
साथै, सिद्धार्थ इक्वाटी फण्डको ११.९६ रुपैयाँ, शुभ लक्ष्मी कोषको ११.९२ रुपैयाँ, लक्ष्मी उन्नती कोषको ११.९० रुपैयाँ र सानिमा लार्ज क्याप फण्डको ११.८६ रुपैयाँ रहेको छ ।
