रहेनन् वरिष्ठ पत्रकार कमल कोइराला
काठमाडौं । वरिष्ठ पत्रकार, अधिवक्ता, पूर्व सांसद तथा राजदूत कमल कोइरालाको निधन भएको छ। उनको सोमबार राति काठमाडौंको सिनामंगलस्थित केएमसी अस्पतालमा निधन भएको हो।
८७ वर्षीय कोइराला गत मंगलबार बानेश्वर, थापागाउँस्थित आफ्नै निवासमा लडेपछि पक्षघातको शिकार भएका थिए। भोलिपल्ट बिहान अस्पताल भर्ना गरी घाँटीको शल्यक्रिया गरिएको थियो। उपचारकै क्रममा सोमबार बेलुकी उनको निधन भएको हो।
कमल कोइराला दिवंगत प्रधानमन्त्री तथा अमेरिका नियुक्त पूर्वराजदूत मातृकाप्रसाद कोइरालाका छोरा हुन्। २०५१ सालको मध्यावधि निर्वाचनमा मोरङबाट विजयी भई संसदीय राज्यव्यवस्था समितिको सभापति र दक्षिण कोरियाका लागि राजदूतसमेत बनेका थिए।
बनारस विश्वविद्यालयबाट बीए र गोरखपुर विश्वविद्यालयबाट एलएलबी उत्तीर्ण गरेका कोइराला सशक्त लेखक तथा स्तम्भकारका रूपमा पनि परिचित थिए।
उनको पार्थिव शरीरलाई नेकपा (एस) को आलोकनगरस्थित केन्द्रीय कार्यालयमा राखी अन्तिम श्रद्धाञ्जली दिइनेछ भने पशुपतिस्थित विद्युतीय शवदाह गृहमा अन्त्येष्टि गरिनेछ।
