नक्कली कागजातको भरमा जागिर खाएका प्रहरीका असई अख्तियारको फन्दामा
काठमाडौं । अख्तियार दुरुपयोग अनुसन्धान आयोगले जिल्ला प्रहरी कार्यालय सिन्धुलीको संचार दरबन्दीमा रहेका प्रहरी सहायक निरीक्षक (असई) कुमार गिरीविरुद्ध भ्रष्टाचारको मुद्दा दायर गरेको छ।
उनले २०५७ सालमा नेपाल प्रहरी जवान पदमा भर्ना हुँदा बिहार संस्कृत शिक्षा बोर्ड पटनाबाट जारी भएको एसएलसी पासको शैक्षिक योग्यता प्रमाणपत्र पेश गरेका थिए।
उनले नक्कली शैक्षिक प्रमाणपत्र पेश गरी जागिर खाएको उजुरी अख्तियारमा परेपछि अख्तियारले उनको शैक्षिक प्रमाणपत्र जाँच गरेको थियो। अनुसन्धानमा उनले झुट्टा र फर्जी प्रमाणपत्र पेश गरेको खुलेपछि अख्तियारले मु्द्दा चलाएको हो।
शुरूमा जवान पदमा भर्ती भएका गिरीको पदोन्नती हुँदै असईसम्म बनेका थिए। अख्तियारले उनलाई झुट्टा कागजात पेश गरी लाभ र सुविधा प्राप्त गरेको भन्दै भ्रष्टाचारको मुद्दा चलाएको हो।
