हिमालयन बैंकलाई वित्तीय विवरणमा सुधार गर्न राष्ट्र बैंकको निर्देशन
काठमाडौँ । नेपाल राष्ट्र बैंकले हिमालयन बैंक लिमिटेडलाई वित्तीय विवरण र लेखापरीक्षण प्रतिवेदनमा उल्लेख गरिएका त्रुटिहरूलाई तत्काल सुधार्न निर्देशन दिएको छ । बैंक सुपरिवेक्षण विभागबाट जारी पत्रमा राष्ट्र बैंकले वार्षिक वित्तीय विवरण सार्वजनिक गर्न स्वीकृति दिए पनि लेखापरीक्षण प्रतिवेदनमा देखिएका कमजोरीहरूको तत्काल सुधार गर्न भनेको हो ।
राष्ट्र बैंकले हिमालयन बैंकलाई पठाएको पत्रमा लेखापरीक्षण प्रतिवेदनमा उल्लेख गरिएका कैफियतहरू पूर्ण रूपमा सच्याउन निर्देशन दिएको छ । साथै, यस्ता त्रुटिहरू भविष्यमा नदोहोरिने गरी आवश्यक व्यवस्थापनको व्यवस्था गर्न पनि अनिवार्य गरेको छ । बैंकले यी निर्देशनलाई वार्षिक प्रतिवेदनको छुट्टै पानामा प्रकाशित गर्नुपर्ने व्यवस्था गरेको छ ।
बैंकको वार्षिक वित्तीय विवरणमा लेखापरीक्षकले औंल्याएका कैफियतहरूबारे स्पष्ट जानकारी सार्वजनिक नगरिएको राष्ट्र बैंकको ठहर छ । यस्ता त्रुटिहरूले बैंकको पारदर्शिता र वित्तीय विश्वसनीयतामा प्रश्न उठाउने राष्ट्र बैंकको चेतावनीमा उल्लेख छ । वित्तीय संस्थाको मुख्य काम पारदर्शी ढंगले सञ्चालन गर्ने हो भने पनि यस्ता त्रुटिहरूले शेयरधनी र निक्षेपकर्ताको विश्वासमा असर पर्ने सम्भावना रहेको छ ।
राष्ट्र बैंकले एकीकृत निर्देशन नं. ४/०८० को बुँदा नं. १ अनुसार, हिमालयन बैंकलाई लेखापरीक्षण प्रतिवेदनका कैफियतहरू सच्याउन, त्यसको पुनरावृत्ति रोक्न र यसको लागि प्रभावकारी व्यवस्थापन प्रणाली लागू गर्न निर्देशन दिएको छ ।
हिमालयन बैंकजस्तो प्रतिष्ठित वित्तीय संस्थाले राष्ट्र बैंकको निर्देशन पाउनुले यसको सञ्चालन व्यवस्थापनमा गम्भीर प्रश्न खडा भएको छ । यस्तो अवस्थामा, बैंकले वित्तीय व्यवस्थापनमा सुधार नगर्ने हो भने यसले लगानीकर्ताको विश्वास गुमाउने खतरा बढ्न सक्छ ।
