बिवाईडीको ईभी बिक्री २०२४ मा वृद्धिः टेस्लाको व्यापारमा सकस, मर्जरबाट टक्कर दिने तयारी होन्डा र निसान

काठमाडौँ । अन्तर्राष्ट्रिय बजार विस्तारका क्रममा चिनियाँ कार निर्माता बिवाईडीले केही चुनौतीहरूको सामना गरिरहेको छ । युरोपेली युनियनले चिनियाँ गाडीहरूमा उच्च शुल्क लगाएको छ भने अमेरिकाले १०० प्रतिशत शुल्क थप गर्दै थप प्रतिबन्धको तयारी गरिरहेको छ । ब्राजिलमा भने श्रमिक शोषणको आरोपमा बिवाईडीले निर्माण कम्पनीसँगको सम्बन्ध तोड्दै कानुनी प्रावधानको पालना गर्ने प्रतिबद्धता जनाएको छ ।

यी चुनौतीहरूका बावजुद, बिवाईडीले २०२४ मा विद्युतीय गाडी (ईभी) बिक्रीमा उल्लेखनीय प्रगति गरेको छ । डिसेम्बर महिनामा मात्रै कम्पनीले २ लाख ७ हजार ७३४ गाडी बिक्री गरेको छ, जसले वार्षिक बिक्री १७.६ मिलियनमा पुर्याएको छ । सरकारी अनुदान र छुटहरूले ग्राहक आकर्षणमा महत्वपूर्ण भूमिका खेलेको छ ।
यस वृद्धिको मुख्य कारण यसको हाइब्रिड गाडीहरूको बिक्री रहेको छ । बिवाईडि चीनमा ९० प्रतिशत गाडी बिक्री गर्दैछ, जहाँ यसले विदेशी ब्रान्डहरूको तुलनामा आफ्नो स्थिति बलियो बनाउँदै गएको छ, जसमा वोक्सवागन र टोयोटा पनि समावेश छन् ।

अर्कोतर्फ, अमेरिकी विद्युतीय गाडी निर्माता टेस्लाको विक्रीमा गत वर्ष एक दशकको लामो अवधिबाट पहिलो पटक गिरावट आएको छ, जसको मुख्य कारण मागमा गिरावट र प्रतिस्पर्धीहरूको बढ्दो प्रभाव रहेको छ । एलोन मस्कको नेतृत्वमा रहेको कम्पनीले गत वर्ष लगभग १.७९ मिलियन गाडी डेलिभरी गरेको छ, जुन २०२३ मा १.८ मिलियन गाडीको तुलनामा लगभग १ प्रतिशतले घटेको हो ।

कम्पनीले गाडीको मूल्य बारम्बार घटाएर खरिदकर्ताहरूलाई आकर्षित गर्न र विश्वको शीर्ष ईभी निर्माता बनेको स्थान कायम राख्न कोशिष गरेको थियो । सोहि प्रभाव यस वर्ष परेको देखिएको छ ।

पश्चिमी बजारका परम्परागत गाडी निर्माताहरूले भने कठिन चुनौतीहरूको सामना गरिरहेका छन् । जापानी कम्पनी होन्डा र निसानले मर्जर वार्ताको घोषणा गरेका छन्, जसले चिनियाँ प्रतिस्पर्धीहरूलाई टक्कर दिने प्रयास गरिरहेको छ ।