गएराति उपत्यकाभित्र छुट्टाछुट्टै दुर्घटनामा परि दुई जनाको निधन
काठमाडौं । काठमाडौं उपत्यकामा सोमबार राति भएका दुई छुट्टाछुट्टै सवारी दुर्घटनामा दुई जनाको ज्यान गएको छ भने एक जना घाइते भएका छन्।
काठमाडौंको नेपालटारमा सोमबार राति साढे ९ बजे बा९७प ६५४९ नम्बरको मोटरसाइकल अनियन्त्रित भएर दुर्घटना भएको थियो। दुर्घटनामा मोटरसाइकलको पछाडि सवार संखुवासभा चैनपुरका ३३ वर्षीय कमल राईको ग्रिनसिटी अस्पतालमा उपचारको क्रममा ज्यान गएको छ। उनी हाल काठमाडौंको बौद्ध क्षेत्रमा बस्दै आएका थिए।
सोही दुर्घटनामा मोटरसाइकल चालक २६ वर्षीय सुभम राई गम्भीर घाइते भएका छन्। उनको टाउको र खुट्टामा चोट लागेको छ र हाल अस्पतालमा उपचार भइरहेको प्रहरीले जनाएको छ।
त्यसैगरी ललितपुरको भैंसेपाटीमा सोमबार राति बा३ख ३१०२ नम्बरको यात्रुबाहक माइक्रोबसले पैदलयात्रीलाई ठक्कर दिँदा ललितपुरको मगरगाउँकी ३५ वर्षीया गोमा लुंगेलीको ज्यान गएको छ। लुंगेलीको उपचारको क्रममा पाटन अस्पतालमा ज्यान गएको हो।
माइक्रोबस बिजुलीको पोलमा ठोक्किएर अनियन्त्रित भएपछि उनीमाथि ठोक्किएको प्रहरीले जनाएको छ।
