नेपाल बैंककी बन्दना शर्मा एनसेल वुमन आइकन आईसीटी अवार्डबाट सम्मानित
काठमाडौं। सूचना प्रविधि क्षेत्रमा निरन्तर सक्रियता र प्रभावकारी योगदानका लागि नेपाल बैंककी बन्दना शर्माले यो वर्षको ‘एनसेल वुमन आइकन आईसीटी अवार्ड’ प्राप्त गरेकी छिन्।
कर्णाली प्रदेशका मुख्यमन्त्री यमलाल कँडेल र एनसेलकी कर्पोरेट कम्युनिकेसन एन्ड सीएसआर प्रमुख विशाखालक्ष्मी खड्काले शर्मालाई संयुक्त रूपमा अवार्ड प्रदान गरेका हुन्। अवार्डसँगै उनले तीन लाख रुपैयाँ नगद पुरस्कार प्राप्त गरेकी छिन्।
बन्दना शर्मा २००६ देखि नेपाल बैंकमा आवद्ध छिन्। बैंकमा प्रवेश गर्दा उनी आईटी सपोर्ट अफिसर थिइन्। हाल उनी बैंकको कार्ड तथा डिजिटल बैंकिङ डिभिजनको नेतृत्व गर्दै डिजिटल प्रविधिमा बैंकको रूपान्तरणमा सक्रिय भूमिका निभाइरहेकी छिन्।
उनले बैंकको कोर बैंकिङ सिस्टम, नेटवर्क सुरक्षा तथा साइबर सुरक्षालाई प्रभावकारी बनाउन उल्लेखनीय योगदान गरेकी छिन्। बैंकका डिजिटल सेवा तथा पूर्वाधारलाई ग्राहकमैत्री बनाउने कार्यमा उनको भूमिका महत्त्वपूर्ण रहेको एनसेलले जनाएको छ।
यसअघि यो अवार्ड सुनैना घिमिरे पाण्डे (२०२३), शिला कंसाकार कार्की (२०२२), गुणकेशरी प्रधान (२०२१) र तिमिला यमी (२०२०) ले प्राप्त गरेका थिए।
