ज्योति समूहको नयाँ अध्याय: अब ‘पद्म ज्योति समूह’
काठमाडौँ । ज्योति समूहले आइतबार आफ्नो नाम परिवर्तन गरी ‘पद्म ज्योति समूह’ घोषणा गर्दै, विकास र सृजनशीलताको नयाँ अध्यायको सुरुवात गरेको छ। काठमाडौँमा आयोजित एक विशेष कार्यक्रममा पद्म ज्योतिले समूहको यो रूपान्तरणले प्रगति र नवीनताप्रतिको प्रतिबद्धता झल्काउने बताएका छन्।
“धेरै बाधा र चुनौतीहरू पार गरे तापनि, समूह आफ्नो उत्कृष्टताको विरासतलाई निरन्तर अघि बढाइरहेको छ,” पद्म ज्योतिले भने। “ज्योति समूहबाट पद्म ज्योति समूहमा परिवर्तनले प्रगति, अनुकूलनता र नयाँ अवसरहरूको खोजीमा हाम्रो समर्पणलाई अझ सुदृढ बनाएको छ।”
उनका अनुसार, समूहले आफ्ना ग्राहकहरूले अपेक्षा गरेको गुणस्तर कायम राख्दै नयाँ सम्भावनाहरू पहिल्याउने लक्ष्य राखेको छ।
पद्म ज्योति समूहको नेतृत्वमा पद्म ज्योतिसहित परिवारका सदस्यहरू सौरभ ज्योति, सृजना शाक्य ज्योति, सुह्रिद ज्योति र आरती ज्योति रहेका छन्। उनीहरूले समूहलाई भविष्यमा अझ धेरै सफलताका चरणमा पुर्याउने प्रतिबद्धता जनाएका छन्।
समूहले आफ्नो व्यापार र व्यवस्थापनमा सृजनशीलता र दिगोपनलाई प्राथमिकतामा राखेर आगामी दिनहरूमा आर्थिक तथा सामाजिक योगदानलाई अझ फराकिलो बनाउने संकेत दिएको छ। यो रूपान्तरणले नेपालको व्यापारिक क्षेत्रमा नयाँ सम्भावना र अवसरहरूको खोजी गर्ने उदाहरण प्रस्तुत गर्ने विश्वास गरिएको छ।
