सामलिङ पावरको क्रेडिट रेटिङ पुनःस्थापित, वित्तीय दायित्वको उच्च जोखिम
काठमाडौं । सामलिङ पावर कम्पनी लिमिटेडको क्रेडिट रेटिङलाई आईसीआरए नेपालले पुनःस्थापित गरेको छ। कम्पनीलाई डबल बी माइनस इश्युअर रेटिङ प्रदान गरिएको छ, जसले वित्तीय दायित्वहरूको समयमै भुक्तानीमा मध्यम जोखिम रहेको संकेत गर्दछ।
आईसीआरए नेपालले कम्पनीको दीर्घकालीन कर्जाको रेटिङलाई एल डबल बी माइनस र छोटो अवधिको कर्जाको रेटिङलाई ए फोर मा पुनःस्थापित गरेको छ। सामलिङ पावरले सञ्चालन गर्दै आएको जलविद्युत् परियोजनाको उत्पादन र बिक्रीबाट उत्पन्न आम्दानी स्थिर रहेको भए पनि यसको वित्तीय दायित्वको उच्च स्तरले जोखिम बढाएको छ।
कुल कर्जाको सीमा १,५७९ मिलियन रुपैयाँ रहेकोमा दीर्घकालीन कर्जा सीमा १,५३४ मिलियन रुपैयाँ र छोटो अवधिको कर्जा सीमा ४५ मिलियन रुपैयाँ तोकिएको छ। आईसीआरए नेपालका अनुसार, कम्पनीले समयमै आफ्नो वित्तीय दायित्व पूरा गर्न कठिनाई हुनसक्ने देखिन्छ, तर यसको परिचालन प्रदर्शन र स्थिर आम्दानी स्रोतले केही सकारात्मक संकेत पनि प्रदान गरेका छन्।
कम्पनीले मुख्यतया जलविद्युत् परियोजनाबाट आम्दानी गर्दै आएको छ, जसको माग स्थिर देखिएको छ।
