गठ्ठाघरमा ट्रकको ठक्करबाट एक जनाको मृत्यु, अर्का घाइते
काठमाडौं । भक्तपुरको गठ्ठाघर चोकमा ट्रकले स्कुटरलाई ठक्कर दिँदा एक महिलाको मृत्यु भएको छ भने उनका श्रीमान् घाइते भएका छन्।
आज बिहान ७ बजे भक्तपुरबाट काठमाडौं जाँदै गरेको १२ चक्के ट्रक (ना ८ ख २३११) ले सोही दिशामा गइरहेको स्कुटर (बा.प्र. ०२–०३८ प ४४०१) लाई ठक्कर दिएको थियो।
दुर्घटनामा परी ४१ वर्षीया नवीना देउलाको उपचारको क्रममा भक्तपुर इन्टरनेशनल अस्पतालमा बिहान पौने ८ बजे मृत्यु भएको प्रहरीको भनाइ छ। उनका श्रीमान् जिते देउला घाइते भएका छन् र अहिले उनको नागरिक अस्पतालमा उपचार भइरहेको छ।
ट्रक चालक मकवानपुरगढी–४ निवासी ३८ वर्षीय बुद्ध बहादुर घलानलाई प्रहरी वृत्त ठिमीले नियन्त्रणमा लिएको छ।
