रोयल इन्फिल्डको बदमासी: ग्राहकको सुरक्षामा गम्भिर खेलवाड, बाइक सस्तोको नाममा मुख्य पार्टनै हटाइयो

काठमाडौँ। हेर्दा आकर्षक तर सुरक्षामा गम्भीर समस्या रहेको रोयल इन्फिल्ड मोटरसाइकल नेपाली बजारमा धमाधम बिक्री भइरहेको छ। कुनै समय युवा पुस्ताको रोजाइमा पर्ने यी मोटरसाइकलले विश्वभर क्लासिक डिजाइन र शक्तिशाली प्रदर्शनका लागि ख्याती कमाएको थियो। नेपालमा पनि यसको लोकप्रियता उचाइमा थियो। तर, पछिल्लो समय रोयल इन्फिल्डको नेपाली बजारमा स्थानीय एसेम्बली र वितरणमा सुरक्षासम्बन्धी गम्भीर खोट देखिन थालेको छ। ग्राहकहरूले सुरक्षा सुविधाहरूमा कटौती गरिएको र मोटरसाइकल गुणस्तरमा गिरावट आएको भन्दै चर्को आलोचना गरिरहेका छन्।

रोयल इन्फिल्ड मोटरसाइकलहरूको वितरण र स्थानीय एसेम्बलीका लागि जिम्मेवार रहेको टीजी अटो ग्रुपले यी मोटरसाइकलहरूको महत्त्वपूर्ण सुरक्षा विशेषताहरू हटाएको विषयमा गुनासाहरू सार्वजनिक भएका छन् । यसमा मुख्य रूपमा एण्टी-ब्रेकिङ सिस्टम (एबिएस) र पछाडिको डिस्क ब्रेक जस्ता अत्यावश्यक सुरक्षा सुविधाहरू हटाइएको पाइन्छ ।

नेपालमा नै एसेम्बल गरेका रोयल इनफिल्ड मोटरसाइकल सस्तो बनाउने भन्दै मुख्य भाग नै हटाउन थालेपछि ग्राहकहरुमा निकै ठुलो जोखिम ल्याउन सक्ने खतरा बढेको हो । मूल्य सस्तो बताउने बताउँदै कम्पनीले मुख्य भाग हटाएर कमाई खाने धन्दा चलाइ रहेको हो ।

एबिएस प्रणालीले ब्रेक लगाउँदा पाङ्ग्राको लक हुन नदिने तथा मोटरसाइकललाई नियन्त्रणमा राख्न मद्दत गर्ने सुविधा हो । त्यस्तै, पछाडिको डिस्क ब्रेकले मोटरसाइकललाई प्रभावकारी तरिकाले रोक्न सहजीकरण गर्दछ । यी सुविधाहरूको अभावले नेपालमा विक्रि भइरहेका रोयल इन्फिल्ड मोटरसाइकलहरू जोखिमयुक्त भएको आरोप उपभोक्ताहरूले लगाएका छन् ।

ग्राहकहरूको विश्वासमाथि आघात

नेपालमा विक्रि भइरहेका मोटरसाइकलहरूको सुरक्षासम्बन्धी यी समस्याहरूले उपभोक्ताहरूमा निराशा पैदा गरेको छ । ब्राण्डप्रति गहिरो विश्वास भएका ग्राहकहरूले पनि अब सुरक्षालाई लिएर प्रश्न उठाउन थालेका छन् ।

उच्च मुल्य तिरेर मोटरसाइकल किन्न तयार भएका ग्राहकहरू गुणस्तरीय उत्पादनको अपेक्षा गर्दछन् । तर, सुरक्षा सुविधाहरूमा गरिएको कटौतीले उनीहरूको अपेक्षालाई धोका दिएको अनुभव गरिएको छ ।

टीजी अटो ग्रुपले नेपालमा रोयल इन्फिल्ड मोटरसाइकलहरूको स्थानीय एसेम्बलीलाई प्राथमिकता दिएको छ । यस कदमले मोटरसाइकलहरूको मूल्य प्रतिस्पर्धात्मक बनाउने उद्देश्य राखे पनि, उत्पादनको गुणस्तरमा आएको गिरावट र सुरक्षा सुविधाहरूको अभावले उपभोक्ताहरूलाई नकारात्मक रूपमा प्रभावित गरेको देखिन्छ ।

स्थानीय एसेम्बलीको कारणले गर्दा मोटरसाइकलको सुरक्षात्मक र प्रविधिगत पक्षहरू अन्तर्राष्ट्रिय स्तरमा उपलब्ध मोडेलहरूसँग मेल नखाने अवस्था सिर्जना भएको छ । यसको प्रत्यक्ष असर उपभोक्ताहरूको सवारी सुरक्षामा पर्ने हुँदा यसले कम्पनीको ब्राण्ड इमेजलाई नकारात्मक रूपमा असर पु¥याएको छ ।

प्रतिस्पर्धात्मक बजारको चुनौती

नेपालमा मोटरसाइकल बजार प्रतिस्पर्धात्मक हुँदै गइरहेको छ । केटीएम, यामाहा, बेनेलीजस्ता ब्राण्डहरूले गुणस्तरीय र प्रविधिसँगै सुसज्जित मोटरसाइकलहरू उपलब्ध गराउँदै उपभोक्ताहरूको मन जितिरहेका छन् । यस्तो अवस्थामा, रोयल इन्फिल्डले सुरक्षा र गुणस्तरमा सम्झौता गर्दा प्रतिस्पर्धामा पछि पर्ने सम्भावना बलियो बनेको छ ।

उपभोक्ताहरूबाट आएका गुनासाहरूका बाबजुद टीजी अटो ग्रुप र रोयल इन्फिल्ड कम्पनीले यस विषयमा स्पष्ट प्रतिक्रिया दिन सकेको छैन । उपभोक्ताहरूलाई आश्वस्त पार्ने कदम नचालिँदा यो समस्या झनै जटिल बन्दै गएको छ । कम्पनीले गुनासाहरूलाई वेवास्ता गर्दा उपभोक्ताहरूको असन्तुष्टि अझै बढ्न सक्ने देखिएको छ ।

रोयल इन्फिल्डले नेपाली बजारमा आफ्नो अस्तित्व बचाइराख्न सुरक्षामा विशेष ध्यान दिन आवश्यक रहेको देखिन्छ । नेपाली उपभोक्ताहरू गुणस्तर र सुरक्षामा सम्झौता गर्न चाहँदैनन् । यसै कारण, कम्पनीले उपभोक्ताहरूको विश्वास पुनः प्राप्त गर्न उचित कदम चाल्न आवश्यक छ । नत्र भने, प्रतिस्पर्धात्मक बजारमा रोयल इन्फिल्डको लोकप्रियता घट्ने जोखिम उच्च हुनेछ ।

रोयल इन्फिल्डको गुणस्तरमा प्रश्न, गुडिरहेको बुलेटमा आगलागी हुँदा एक जनाको निधन