चन्द्र ढकालको आइएमई लिमिटेडले आईपीओ जारी गर्ने, साधारणसभामा एजेण्डा पेश गर्दै
काठमाडौं । चन्द्र ढकालको आइएमई लिमिटेडले आईपीओ जारी गर्ने भएको छ। कम्पनीले सोको प्रस्ताव सहित मंसिर २४ गते सोमबार २४औं वार्षिक साधारणसभा बोलाएको छ।
कम्पनीको कात्तिक २८ गते बसेको सञ्चालक समितिले काठमाडौंको पानीपोखरीस्थित कम्पनीको रजिष्टर्ड कार्यालय, आइएमई कम्प्लेक्समा अपरान्ह ४ बजे सभा बस्ने निणर्य गरेको हो।
उक्त सभाले सर्वसाधारणलाई शेयर (आईपीओ) जारी गर्ने र प्रबन्धपत्र तथा नियमावलीमा आवश्यक संशोधन गर्न सञ्चालक समितिलाई पूर्ण अख्तियारी दिने विशेष प्रस्ताव पारित गर्नेछ।
यसका साथै गत आर्थिक वर्षको वित्तीय विवरणहरू छलफल गरी पारित गर्ने, चालू आवका लागि लेखापरीक्षक नियुक्ति गरी निजको पारिश्रमिक निर्धारण गर्ने, सञ्चालक समिति चयन गर्ने र लाभांश वितरण गर्ने लगायतका एजेण्डाहरू पनि समावेश छन्।
