‘सिल्भर’ ब्राण्ड प्राप्त जनसचेतन सहकारीमा २ अर्ब २५ करोड हिनामिना, एमाले र समाजवादीका नेता संलग्न

काठमाडौं । सत्ताधारी एमाले, माधव नेपाल नेतृत्वको एकीकृत समाजवादी र केही प्राध्यापकहरूको मिलेमतोमा दोलखाका विभिन्न सहकारीको २ अर्ब ६४ करोडभन्दा बढी रकम हिनामिना भएको तथ्य बाहिर आएको छ । यो सहकारी हिनामिना प्रकरणको अनुसन्धान गर्ने निकायमा समेत स्वयं तिनै व्यक्तिहरू संलग्न भएको समेत खुल्न आएको छ ।

दक्षिण एसियाकै टप सहकारी भनेर सूचीकृत दोलखा बैतेश्वर गाउँपालिका-५ मा प्रधान कार्यालय रहेको जनसचेतन बचत तथा ऋण सहकारी संस्थाका करिब ४० हजार बचतकर्ताको २ अर्ब २५ करोड ६० लाख ८७ हजार ३ सय ९३ रुपैयाँसहित अन्य सहकारीहरूको रकम अपचलन भएको तथ्य बाहिर आएको हो । सहकारी संस्थाहरुको एसियाली परिसंघबाट सर्टिफाइड एसीसीईएसएस सिल्भर ब्राण्ड प्राप्त जनसचेतन सहकारीले बिना धितो ऋण प्रवाह गरेको तथा मिलेमतोमा नगद कारोबार गरेर जग्गा प्लटिङमा लगानी गरेको समेत भेटिएको छ ।

त्यति मात्र नभई धितोमा रहेका जग्गाको मूल्याङ्कन भन्दा १०० गुणा बढी ऋण प्रवाह गरेको तथ्यहरु बाहिर आएका छन् । जनसचेतनका अध्यक्ष हुन्, हेमन्त कुमार चौलागाईं । जो एमाले निकट मानिन्छन् । सहकारी सङ्घ बागमती प्रदेशका महासचिव समेत रहेका भीमप्रसाद दाहाल समेत जनसचेतनको हिनामिना प्रकरणका साझेदार हुन् । जो एकीकृत समाजवादी दोलखाको जिल्ला अध्यक्ष छन् । उनकै डिजाइनमा करिब ५० लाखको धितोमा आठ करोड रुपैयाँ ऋण प्रवाह भएको हो ।

यो हिनामिनामा सहयोग गर्ने गोपालधोज श्रेष्ठ नै छानविनमा संलग्न रहेको बताइन्छ । जो गोपालेश्वर क्याम्पसका पूर्व प्राध्यापक एवं एमालेका नेता हुन् । यस्तै, वुद्धिजीवि भनिउका नारायण दाहाल समेत यो हिनामिनालाई ढाकछोप गर्ने र मिलापत्र गराउने गतिविधिमा संलग्न छन् । अर्को सहकारीमा भएको हिनामिनामा पनि एमाले जिल्ला कमिटी सदस्य देवीप्रसाद फुयाल मुछिएका छन् । उनी प्रगतिशील बचत तथा ऋण सहकारी संस्थामा आवद्ध भएर काम विगारेका हुन् । जुन सहकारीमा तीन पटकसम्म चोरी भएको नाटक मञ्चन भएको थियो । यद्यपि, अनुसन्धान गर्ने निकायलाई अनुसन्धान गर्नबाट रोकिएको छ ।

उता, तामाकोशी-३ मा सञ्चालित सामरिक बचत तथा ऋण सहकारी संस्थाका प्रबन्ध निर्देशकले समेत बचतकर्ताको रकम सहकारीको खातामा जम्मा नगरी प्रबन्धकको आफ्नै निजी खातामा जम्मा गरेको र करिब १ करोड ७ लाखभन्दा बढी हिनामिना गरेको संस्थामै कार्यरत कर्मचारीले बताएका छन् ।

उक्त सहकारीले पनि सामान्य धितोमा १०० गुणासम्म बढी ऋण लगानी गरेको भेटिएको छ । ती ऋणहरु उठ्ने वा फिर्ता हुने अवस्था नभएको बताइन्छ । बचतकर्ताले बचत फिर्ता पाइरहेको अवस्था छैन । उजुरी दर्ता गर्ने सहकारी डिभिजन कार्यालय, नगरपालिका तथा गाउँपालिकाको सहकारी विभागमा समेत उनीहरुले आफ्नै सेटिङका मान्छेहरु भर्ती गरेर राखेको अवस्था छ ।

जनसचेतनका अनेक काण्ड
जग्गा प्लटिङदेखि संस्थाभित्रको बेथिति सार्वजनिक हुने डरले जनसचेतन सहकारीका सञ्चालक समिति सदस्य तथा प्रमुख कार्यकारी अधिकृत सीईओले स्थायी नियुक्तिका सवारी चालकलाई जागिरबाट निकालेका थिए ।

२०७९ चैत ५ गते बैतेश्वर-५ कै रामकाजी मिजारलाई जागिरबाट वर्खास्त गरेको चिठी काटिएकामा एक दिन पहिले ४ चैतमा सञ्चालक समितिको बैठक बसेको फर्जी माइन्युट गरेको भेटिएसँगै मिजारले श्रम अदालतबाट मुद्दा जितेर पुर्नवहाली भएका छन् ।

जनसचेतनको प्रमुख कार्यकारी अधिकृत सीईओ हुनुअघि काठमाडौंमा बेकामे भई डाङडाङ डुङडुङ गर्दै हिँडेको नवराज दाहाल अहिले पनि संस्था मै छन् । र, काठमाडौंलगायत शहरमा एटीएम मेसिन नै राख्ने हैसियत भएको सहकारीलाई उनले आफ्नो पारिवारिक अखडा बनाएका छन् ।

सहकारीमा स्थायी नियुक्तिको चालक हुँदा हुँदै संस्थाको गाडी मनोमानी हुइँकाएर खोलामा खसाल्ने शिव खतिवडा सीईओ नवराजका आफ्नै साला हुन् । एकताका शिवले चरिकोट गएकाबेला गाडी ठोक्काए । डेन्टिङपेन्टिङ चरिकोटमा गराएर बिल भने सीईओकै भिनाजुको मैनापोखरीस्थित ग्यारेजको पेश गरेको भेटिएको थियो ।

त्यति मात्र नभई सहकारी कै गाडी हुइँकाएर ठमेलको दोहोरी छिरेका नवराज र शिवले परस्त्रीलाई ब्याड’टच गरेको भन्दै काठमाडौंमा पिटाइ खाएका थिए । काभ्रेको नालामा जग्गा प्लटिङ गर्ने समूह पनि नवराज र शिव कै रहेको बताइन्छ । संस्थाको करोडौं रकम अपचलन गरेर उक्त प्लटिङ समेत उनीहरुले अलपत्र पारेका छन् ।

प्लटिङका लागि सीईओ नवराजले सहकारीबाट करोडौं पैसा झिकेका थिए भने यो समूहमा तत्कालीन कोषाध्यक्ष भरत केसी, पूर्व सह–सचिव नारायणप्रसाद दाहाल समेतको संलग्नता छ ।