चाडपर्वमा टाटा मोटर्सको निःशुल्क चार्जिङ्ग सेवा: आकस्मिक सर्भिस र रोडसाइड सुविधा पनि उपलब्ध
काठमाडौं । नेपालका लागि टाटा मोटर्सको आधिकारिक वितरक सिप्रदी ट्रेडिङ प्रालिले चाडपर्वको अवसरमा आफ्ना ग्राहकहरूलाई विशेष सुविधा प्रदान गर्दै फास्ट डिसी चार्जिङ्ग स्टेशनमा निःशुल्क चार्जिङ्गको सेवा घोषणा गरेको छ। यो सेवा विशेषगरी विदाको समयमा विद्युतीय सवारी प्रयोगकर्ताहरूलाई लक्षित गरिएको छ, जसले गर्दा यातायातको समयमा कुनै असुविधा महसुस नहोस्।
टाटा मोटर्सले देशभर रहेका आफ्ना सर्भिस सेन्टरहरूबाट आकस्मिक सेवा उपलब्ध गराउने व्यवस्था पनि गरेको छ। विदाका दिनहरूमा काठमाडौंका बाघडोल र गोगंबुमा रहेका दुईवटा सर्भिस सेन्टरहरू खुला रहनेछ। यी केन्द्रहरूमा प्यासेन्जर गाडीहरू र ट्याक्सीहरूको सर्भिसिङ्ग र चार्जिङ्ग सेवा प्रदान गरिनेछ। यसबाहेक, अन्य क्षेत्रीय सर्भिस सेन्टरहरूले पनि ब्रेकडाउन सेवा उपलब्ध गराउनेछन्, जसले गर्दा टाटा सवारी प्रयोगकर्ताहरूलाई तत्काल सहयोग प्राप्त होस्।
ग्राहकहरूले कुनै पनि आकस्मिक अवस्थामा रोडसाइड सेवाका लागि हटलाइन टोल फ्री नम्बर १६६००१५५७७७ वा ९८०१५७५७७७ मा सम्पर्क गर्न सक्नेछन्। सिप्रदी ट्रेडिङले यी सेवाहरूमार्फत विद्युतीय सवारी साधन प्रयोगकर्ताहरूलाई सुरक्षाको प्रत्याभूति दिने प्रयास गरेको छ।
चाडपर्वको समयमा सुरक्षित र सहज यात्रा सुनिश्चित गर्न यो अभियानले टाटा मोटर्सका विद्युतीय सवारी प्रयोगकर्ताहरूलाई विशेष लाभ पुग्ने विश्वास गरिएको छ।
