दशैँ अघिको अन्तिम कारोबारमा झिनो अंकले बढ्यो नेप्से
काठमाडौँ । साता कारोबारको चौथो दिन अर्थात दशैअघिको अन्तिम कारोबारमा शेयर बजार झिनो अंकले बढेको छ ।
बुधबार नेप्से परिसूचक ४.८५ अंकले बढेर २६६८.१७ को विन्दुमा कायम भएको छ । शेयर बजार बढेतापनि मंगलबारको तुलनामा कारोबार रकम चाँही घट्न पुगेको छ ।
आज कारोबार भएका २९४ वटा कम्पनीहरुको ८३ लाख १२ हजार कित्ता शेयर खरिद–बिक्री हुदाँ तीन अर्ब ७६ करोड १५ लाख रुपैयाँको कारोबार भएको छ । जसमा आज १३० वटा कम्पनीको शेयरमूल्य बढ्न गएको छ भने १०२ वटाको शेयरमूल्य राताम्मे बनेको छ ।
बुधबारका दिन विकास बैंक, लगानी र जीवन बीमा उपसूचकमा बाहेक अन्य सबैको शेयरमूलयमा हरियाली छाएको छ ।
