सफलता र स्थिरतामा जगदम्बा स्पिनिङ मिल्सको उत्कृष्ट प्रदर्शन, वित्तीय स्वास्थ्य बलियो बनाउँदै

काठमाडौँ । नेपालको कपडा उद्योगमा प्रतिष्ठित कम्पनी जगदम्बा स्पिनिङ मिल्स लिमिटेड निरन्तर प्रगतिको यात्रामा अघि बढिरहेको छ । सन् २००५ सेप्टेम्बरमा स्थापना भएको यो कम्पनीले सन् २०२१ जुलाईमा पब्लिक लिमिटेडमा रुपान्तरण भएसँगै उद्योगमा थप उचाइ लिइरहेको हो ।

कम्पनीले आर्थिक वर्ष २०७८/७९ मा १ अर्ब ५६ करोड ४० लाख रुपैयाँको कुल आम्दानी गरेकोमा २०७९/८० मा यो वृद्धि भएर २ अर्ब ३२ करोड ८० लाख रुपैयाँमा पुगेको थियो । यसका साथै, २०८०/८१ मा कम्पनीको आम्दानी झनै वृद्धि गर्दै ३ अर्ब ७९ करोड ६० लाख रुपैयाँ पुगेको हो भने यो आर्थिक वर्षमा ३ अर्ब ९२ करोड रुपैयाँ पुग्ने अपेक्षा गरिएको छ । यसले कम्पनीको उत्पादन र बिक्रीमा निरन्तर सुधार हुँदै गएको देखिएको छ ।

कम्पनीको लाभांश परिप्रेक्ष्यबाट हेर्दा, EBITDA मर्जिन पनि उल्लेखनीय रूपमा सुधार भएको छ । २०७८/७९ मा १८.३९ प्रतिशत रहेको EBITDA मर्जिन, २०७९/८० मा २२.३० प्रतिशत पुगेको थियो । यद्यपि, २०८०/८१ मा केही गिरावट आएर १४.१४ प्रतिशत रहेको मर्जिन, यो वर्ष १३.३० प्रतिशतमा कायम रहेको छ । यसको बावजूद, कम्पनीले आफ्नो प्रभावकारी लागत व्यवस्थापनको बलमा आफूलाई बजारमा मजबुत बनाइरहेको छ ।

रूपन्देहीको कमारियामा अवस्थित यसको उत्पादन केन्द्र र काठमाडौंको टिंकुनेमा रहेको कर्पोरेट कार्यालयले कम्पनीको प्रभावकारी व्यवस्थापनलाई झल्काउँछ । कम्पनीले मुख्यतया पलिएस्टर स्पन यार्न र पलिएस्टर भिस्कोस यार्नको उत्पादनमा विशेषज्ञता हासिल गरेको छ । यसले १७,८८५ मेट्रिक टन प्रति वर्ष उत्पादन क्षमता राख्दै आएको छ ।

जगदम्बा स्पिनिङ मिल्सका प्रमुख शेयरधनीहरूले कम्पनीको सफलतालाई थप मजबुत बनाएका छन् । दुर्गा प्रसाद न्यौपानेको कम्पनीमा करिब ३० प्रतिशत बिष्णु प्रसाद न्यौपानेको २१ प्रतिशत र बैवभ न्यौपानेको १६ प्रतिशत शेयर रहेको छ । शेयरहोल्डरहरूको सहकार्य र बजारमा उनीहरूको अनुभवको कारणले नै कम्पनीले राष्ट्रिय तथा अन्तर्राष्ट्रिय रूपमा आफ्नो प्रतिष्ठा बलियो बनाइरहेको छ ।

कर्जाको व्यवस्थापन र बैंक सुविधाहरू

जगदम्बा स्पिनिङ मिल्सले आफ्नो वित्तीय सञ्चालनमा विविध बैंक सुविधाहरू प्रयोग गरिरहेको छ । यसअन्तर्गत ७५५ मिलियन रुपैयाँको छोटो अवधिको बैंक कर्जा र १,४६९ मिलियन रुपैयाँको गैर–कोषित बैंक सुविधा उपलब्ध छ, जसमा कम्पनीलाई ‘IRN A3’ स्तरको क्रेडिट रेटिङ प्राप्त भएको छ। यो रेटिङले कम्पनीको आर्थिक व्यवस्थापनलाई मजबुत र विश्वसनीय ठहर गर्दछ ।

विगतमा सफलताको आधारमा, जगदम्बा स्पिनिङ मिल्सले भविष्यमा पनि नेपालका कपडा उद्योगमा आफ्नो पकड थप मजबुत बनाउने योजनाहरू अगाडि सारेको छ । कम्पनीको उत्पादन क्षमता र गुणस्तरमा निरन्तर सुधार गर्दै अन्तर्राष्ट्रिय बजारमा प्रतिस्पर्धी रूपमा उत्रिने लक्ष्य कम्पनीले राखेको छ । यससँगै, नयाँ प्रविधिको प्रयोग र दक्ष जनशक्तिको व्यवस्थापनले कम्पनीलाई थप उचाइमा पुर्याउने विश्वास गरिएको छ ।