लेबनानमा इजरायली आक्रमणमा परी ४९२ जनाको मृत्यु
बेरुत । लेबनानमा इजरायली आक्रमणमा परी मर्नेहरुको संख्या चार सय ९२ जना पुगेको छ । बेलायती समाचार संस्था बीबीसीका अनुसार मृतकमध्ये ३५ बालबालिका र ५८ महिला रहेको र १ हजार ६ सय ४५ जना घाइते भएका छन् । यो हताहतमा सर्वसाधारण वा लडाकुहरू कति थिए भन्ने यकिन भएको छैन । यो घटना २० वर्षे द्वन्द्वको सबैभन्दा घातक दिन भएको समेत जनाइएको छ ।
यसबारेमा हामीलाई अहिलेसम्म थाहा भएको यति हो, लेबनानका स्वास्थ्य मन्त्री फिरास अबियादले पत्रकार सम्मेलनमा भने, ‘लक्षित क्षेत्रहरुबाट हजारौँ परिवार विस्थापित भएका छन् ।’ उनका अनुसार हिजबुल्लाह पेजर र वाकी–टाकीहरु विस्फोट र बेरुतको दक्षिणी उपनगरहरूमा इजरायली आक्रमणमा ‘एक साताभन्दा कम समयमा’ करिब पाँच हजार मानिस घाइते भएका थिए ।
प्यालेस्टिनी लडाकू समूह हमासले इजरायलमाथि अहिलेसम्मकै सबैभन्दा खराब आक्रमण गरेपछि युद्ध सुरु भएको थियो । यसमा हिजबुल्लाह र क्षेत्रका अन्य इरान समर्थित समूहहरु हिंसामा तानिएका थिए । इजरायलले सोमबार दर्जनौँ आक्रमणमार्फत तीन सयभन्दा बढी हिजबुल्लाह स्थलमा प्रहार गरेको बताएको छ । हिजबुल्लाहले भने उत्तरी इजरायलका तीन स्थानलाई लक्षित गरेको बताएको छ ।
स्वास्थ्य मन्त्रालयले ‘बिहानदेखि दक्षिणी सहर र गाउँहरुमा इजरायली शत्रुको आक्रमण’ ले ‘एक सय ८२ जनाको ज्यान लिएको र अन्य सात सय २७ जनालाई घाइते बनाएको’ बताएको छ । मृतक र घाइतेहरूमा बालबालिका, महिला र स्वास्थ्यकर्मीहरु पनि छन् ।
विश्व शक्तिहरले इजरायल र हिजबुल्लाहलाई पूर्ण युद्धको संघारबाट पछि हट्न आग्रह गरेका छन् । पछिल्ला दिनहरुमा हिंसाको केन्द्र गाजासँगको इजरायलको दक्षिणी मोर्चाबाट लेबनानसँगको उत्तरी सीमातर्फ तीव्ररुपमा सरेको छ । –बीबीसीको सहयोगमा
