१४५ अकंले घट्यो मार्केटः साढे २३ अर्बको ऐतिहासिक कारोबार, माफिया बजारबाट निस्किदा नयाँ लगानीकर्ता डुबे

काठमाडौँ । शेयर बजार राताम्य भएको छ । बजारमा आएको भारी गिरावटले शेयर लगानीकर्ता त्रसित बनेका छन् । पछिल्ला केहि दिन यता निरन्तर उचाई तिर लम्किरहेको बजारमा आज भने पहिरो गएको हो ।

पुँजी बजारमा आएको गिरावटले केहि लगानीकर्ताले करेक्सन भनेका छन् भने केहिले चलखेल गर्नेहरुले स–साना लगानीकर्ता डुबाएको बताउँदै आइरहेको छन् । सोमबार सांसद अमरेश कुमार सिंहले बजार कृत्रिम रुपमा केहि सीमित ब्यक्तिले बढाएर साना लगानीकर्ताको लगानी जोखिममा पारेका बताएका थिए । उनले केहि कम्पनी र लगानीकर्ताहरुको नाम नै लिएर चलखेल भइरहेको हुँदा छानबिन हुनुपर्ने माग गरे । जसले गर्दा शेयर बजारका लगानीकर्ताको मनोबल खस्किएको छ ।

पूर्वअर्थमन्त्री प्रकाश सरण महतले पनि बजारमा माफियाहरु चलखेल भइरहेको तर्क गरेका थिए । उनले मौद्रिक नीति मार्फत खुुकुलो नीतिले बजारमा माफियाको चलखेल बनाएको तर्क राखेका हुन् । जसले गर्दा लगानीकर्ता त्रसित बन्न पुगेका छन् । एक महिना अघि ५।६ सय रुपैयाँ रहेको केहि कम्पनीहरुको शेयर मूल्यमा आएको उछालले माफियाले खेलि रहेको प्रष्ट हुन्छ ।

नवप्रवेशी लगानीकर्ता यो समयमा डुब्नबाट बच्नु पर्ने देखिन्छ । केहि सीमित ब्यक्तिले वित्तीय अवस्था, नेटवर्थ, इपिएस नै ऋणात्मक भएको कम्पनीमा चलखेल गरेर साना लगानीकर्ताको लगानी जोखिम पार्ने गरेका छन् । अहिले ठुला लगानीकर्ता नाफा बुक गर्ने बाहिर निस्किएका छन् । जसले गर्दा साना लगानीकर्ताको लगानी खरानीमा पानी जस्तै भएको छ ।

ठुला लगानीकर्ता बिक्री गर्ने तिर हाबि हुँदा शेयर बजारमा इतिहासिक कारोबार भएको छ । कारोबार हालसम्मकै उच्च बन्न पुगेको हो । नेपाल स्टक एक्सचेञ्ज (नेप्से) १४५.०५ अकंले घटेर २६५१.३२ बिन्दुमा कायम भएको छ । आज ३२२ कम्पनीको ५करोड ३८ लाख ४४ हजार २३७ कित्ता शेयर किनबेच हुँदा २३ खर्ब ७१ करोड ६७ लाख रुपैयाँको कारोबार भएको छ ।

यसदिन १३ वटै उपसूचक राताम्य भएका छन् । आज बैंकिङ्ग समूहको ५.९६ प्रतिशत, विकास बैंक समूहको ५.४३ प्रतिशत, फाइनान्स समूहको ८.२७ प्रतिशत, होटल तथा पर्यटन समूहको ८.०३ प्रतिशतले शेयर मूल्य घटेको छ ।

मंगलबार आठ कम्पनीको शेयर मूल्य मात्र बढेको छ । २२३ कम्पनीको शेयर मूल्य राताम्य भएको छ ।