काठमाडौं उपत्यकाबाट सबै विद्युत पोल हट्ने, माइतीघरदेखि तीनकुनेसम्म प्राधिकरणले पाएन सडक खन्ने अनुमति
काठमाडौं । नेपाल विद्युत् प्राधिकरणले काठमाडौं उपत्यकामा असरल्ल रहेका सबै विद्युतीय पोल हटाउने भएको छ । काठमाडौँका विभिन्न ठाउँमा जडान भइसकेका भूमिगत विद्युत् प्रणाली अब केही दिनमा परीक्षणका रूपमा सञ्चालनमा ल्याउने र त्यस क्षेत्रका विद्युतीय पोल तथा तार हटाउने प्राधिकरणले जनाएको छ ।
प्राधिकरणले सार्वजनिक सूचना जारी गर्दै काठमाडौंका पेप्सीकोला-जडीबुटी, लैनचौर–नारायणगोपाल चोक, चुच्चेपाटी–चाबहिल–मित्रपार्क, कलङ्की–त्रिपुरेश्वर, कालीमाटी–बल्खु, कीर्तिपुर–रिङरोड र सामाखुसी टाउन प्लानिङमा भूमिगत विद्युत् जडान सम्पन्न गरिसकेकाले ती स्थानमा अबको छ महिनाभित्र पोल हटाइने प्राधिकरणले जानकारी दिएको हो ।
सूचनामा भूमिगत विद्युत् प्रणाली योजना पूरा भइसकेका उल्लिखित ठाउँका बिजुली पोलमा जडान भएका सडकबत्ती, अप्टिकल फाइबर, इन्टरनेट केबुल, सिसी क्यामरालगायतका संरचना र उपकरण छ महिनाभित्र हटाउन सूचित गरेको छ । “संरचना एवं उपकरण नहटाएमा प्राधिकरणले पोललगायतका ओभरहेड संरचना हटाउँदा हुने क्षतिप्रति नेपाल विद्युत् प्राधिकरण जिम्मेवारी नहुने बेहोरासमेत जानकारी गराइन्छ,” प्राधिकरणले सूचनामा भनेको छ ।
प्राधिकरणका कार्यकारी निर्देशक कुलमान घिसिङले इन्टरनेट सेवाप्रदायक तथा अन्य पोल प्रयोगकर्ताले विद्युत् तार भूमिगत गर्ने क्रममा राखिएको ४८ कोर क्षमताको अप्टिकल फाइबर प्रयोग गर्ने सुविधा उपलब्ध रहेको जानकारी दिए । यसबाहेक अन्य सुविधा प्रयोगका लागि दुई वटा डक्ट पनि भूमिगत गरिएको छ । “हामीले पोल हटाउन सूचना जारी गरेको पहिलो पटक हो, अब यसले अन्य सेवाप्रदायकलाई विकल्प उपलब्ध गराउने विषयमा सरोकारवालासँग संवाद गर्दै जान्छौँ,” उनले भने, “यो अवधिमा नयाँ क्षेत्रमा पनि सम्पन्न हुँदै जाँदा सूचित गर्दै जाने छौँ ।”
प्राधिकरणले काठमाडौँमा तीन प्याकेजमा तार भूमिगत गर्ने कार्य गर्दै आएको छ । सडक विभागले समयमा अनुमति नदिँदा महत्वपूर्ण ठाउँमा काम गर्न पाएको छैन । विशेष गरेर माइतीघरदेखि तीनकुने, त्रिपुरेश्वर सुन्धारा हुँदै लैनचौर र पुतलीसडक क्षेत्रमा सडक खन्ने अनुमति नपाउँदा काम हुन पाएको छैन ।
प्राधिकरण आयोजना विकास निर्देशनालयका प्रमुख ताराप्रसाद प्रधानका अनुसार निर्माणको ठेक्का अवधि नै सकिन लाग्दासमेत अनुमति नपाउँदा ठेकेदारले काम गर्नै पाएको छैन । यद्यपि उपत्यका अन्य स्थानमा तार भूमिगत गर्ने कार्य जारी छ । निर्माण सम्पन्न हुँदै जाँदा क्षेत्र तोकेर सूचना जारी गर्दै पोल हटाउने क्रम निरन्तर हुने बताइएको छ । यस कार्यका लागि टेन्डर नै आह्वान प्राधिकरणले जनाएको छ ।
प्राधिकरणले यसअघि नै रत्नपार्क, चाबहिल क्षेत्रमा भूमिगत प्रणालीबाट विद्युत् वितरण सुरु गरिसकेको छ । परीक्षणकै क्रममा रहेकाले ती ठाउँका बिजुलीका पोल हालसम्म हटाइएका छैनन् । प्राधिकरणले २०७६ सालदेखि काठमाडौँ उपत्यकाको विद्युत् वितरण प्रणालीलाई भूमिगत बनाउने काम शुरु गरेको थियो । भूमिगत विद्युत् प्रणाली योजना काठमाडौँ उपत्यकासहित पोखरा र भरतपुरमा पनि चलिरहेको छ ।
