साढे ६२ हजारले दिए सिंगटी हाइड्रोको हकप्रदमा आवेदन, कति कित्ता भयो संकलन ?
काठमाडौँ । सिंगटी हाइड्रो इनर्जी लिमिटेडको हकप्रदमा १८ करोड ९१ लाख २६ हजार ५०० रुपैयाँ संकलन भएको छ । सिडिएसका अनुसार आज अर्थात फागुन १७ गते साँझ ५ः०६ बजेसम्म ६२ हजार ८४१ जना आवेदकले १८ लाख ९१ हजार २६५ कित्ताका लागि आवेदन दिएको हुन् ।
कम्पनीले फागुन २ गतेदेखि हाल कायम चुक्ता पूँजीको शत प्रतिशत हकप्रद निष्कासन गरेको हो । कम्पनीले १ अर्ब ४५ करोड रुपैयाँ बराबरको प्रतिशेयर १०० रुपैयाँ अंकित मूल्य बराबरको १ करोड ४५ लाख कित्ता हकप्रद सेयर निष्कासन गरेको छ । हकप्रद निष्काशनका लागि कम्पनीले पुष २२ गते बुकक्लोज गरेको थियो। यस अनुसार पुष १९ गतेसम्म नेप्सेमा कारोबार भइ कायम सेयरधनीहरुले सो हकप्रद शेयरका लागि आवेदन दिन सक्नेछन्।
हकप्रद सेयरमा फागुन २२ गतेसम्म आवेदन दिन सकिनेछ। कम्पनीको सेयर निष्काशन तथा बिक्री प्रबन्धक कुमारी क्यापिटल लिमिटेड रहेको छ। हकप्रदमा लगानीकर्ताले बिक्री प्रबन्धकका साथै कुमारी बैंक, नेपाल इन्भेष्टमेन्ट मेगा बैंक, प्रभु बैंक र नेपाल बैंकका तोकिएका शाखा कार्यालयहरुबाट आवेदन दिन सक्नेछन्। साथै नेपाल धितोपत्र बोर्डबाट अनुमति लिई आस्वा सेवामा सहभागी बैंक तथा वित्तीय संस्थाहरुबाट सि आस्वा प्रणालीमार्फत र सिडिएस एण्ड क्लियरिङ्गबाट निर्माण गरिएको सफ्टवेयर मेरो सेयर अनलाइन प्रयोग गरी आवेदन दिन सकिनेछ।
हाल कम्पनीको चुक्ता पूँजी १ अर्ब ४५ करोड रुपैयाँ रहेको छ। हकप्रद निष्काशन तथा बाँडफाँटपश्चात कम्पनीको चुक्ता पूँजी २ अर्ब ९० करोड रुपैयाँ पुग्नेछ। हकप्रद निष्काशनका लागि गराएको रेटिङ्गमा केयर रेटिङ्ग नेपालले कम्पनीलाई केयर एनपी डबल बी इस्यूअर रेटिङ्ग प्रदान गरेको छ।
