डीएसपी हुँ भन्दै ड्राइभरलाई अश्लील गाली गर्ने प्रविण पक्राउ, उनी कुनै प्रहरी नभएको पुष्टी
काठमाडौं । सार्वजनिकस्थालमा निजी गाडी चालकलाई अपशब्द प्रयोग गर्ने काठमाडौं चुनदेवीका प्रविण श्रेष्ठ पक्राउ परेका छन् । एक जना निजी गाडी चालकलाई उनले रातिको समयमा सार्वजनिकस्थलमा अपशब्द प्रयोग गर्दै रंगभेदी गाली गरेको भिडियो सामाजिक सञ्जालमा सार्वजनिक भएको थियो ।
भिडियोमा देखिए र सुनिए अनुसार उनले प्रहरीको डीएसपी हुँ भन्दै अपशब्द प्रयोग गरेका थिए । गाडीमै सवार एक जना महिलाले दाइ-दाइ भनेर सम्बोधन गर्दा र चालकले तपाईं भनेर सम्बोधन गर्दा पनि प्रविणले उनीहरुलाई अपशब्द प्रयोग गरेका थिए ।
उनलाई नैतिकताविरुद्धको कसुर गरेको आरोपमा पक्राउ गरेको प्रहरीले जनाएको छ । उनी नेपाल प्रहरीको बाहलवाला वा अवकास प्राप्त कुनै कर्मचारी नभएको समेत प्रहरीले पुष्टी गरेको छ ।
