सुर्यज्योति लाइफद्वारा बीमितको जोखिम बहन नगर्ने बाल बीमा पोलिसी बिक्री गरेर ठगी गर्दै

काठमाडौं । सुर्यज्योति लाइफ इन्स्योरेन्स कम्पनीले त्रुटीपूर्ण बालबीमा पोलिसी बिक्री गर्दै आएको खुलेको छ । बीमापोष्टलाई प्राप्त कागजातमा सुर्यज्योति लाइफले बालबालिका सम्बन्धी बीमा पोलिसी बीमाको आधारभूत सिद्धान्त भन्दा विपरित तयार गरी झुक्याएर बिक्री वितरण गर्दै आएको खुलेको छ । कम्पनीले हालसम्म सयौं बाल बीमा पोलिसी बिक्री गरिसकेको छ ।

सुर्यज्योति लाइफले हाल बिक्री गरिरहेको ‘सुनौलो भविष्य बाल जीवन बीमा पोलिसी’ मा बीमितको जोखिम केवल २५ प्रतिशत वा तिरेको बीमा शुल्क मात्रै रक्षावरण गरिएको पाएको छ । बीमाको आधारभूत सिद्धान्त अनुसार बीमितको शतप्रतिशत जोखिम रक्षावरण गर्नुपर्ने हुन्छ । तर, सुर्यज्योति लाइफको उक्त बाल बीमा पोलिसीमा बीमित बालबालिकाका कुनै कारणबाट निधन भएमा बीमाङ्क रकम पाउने छैनन् । जम्मा २५ प्रतिशत वा तिरेको बीमा शुल्क जुन बढि हुन्छ सो पाउनेछन् र बीमा पोलिसी स्वतः अन्त्य हुनेछ ।

बीमितको निधनमा जोखिम बहन नगर्ने बीमा पोलिसी बीमा पोलिसी हुनै नसक्ने बीमा क्षेत्रका जानकारहरु बताउँछन् । तर, सुर्यज्योति लाइफले बीमाको आधारभूत सिद्धान्त, मूल्य मान्यता विपरित दिन दहाडै बीमितको जोखिम रक्षावरण नगर्ने बीमा पोलिसी बिक्री वितरण गरिरहेको छ ।

नेपाल बीमा प्राधिकरणबाट स्वीकृति लिई बिक्री वितरण गर्दै आएको सुर्यज्योति सुनौलो भविष्य बाल जीवन बीमालेखको शर्त नं ३ मा भनिएको छ, ‘जोखिम प्रारम्भ भए हुने मितिपछि बीमालेख चालु रहेको अवस्थामा बीमित बालबालिकाको मृत्यु भएमा बीमालेखको शर्तहरुको अधिनमा रही बीमाङ्कको २५ (पच्चिस प्रतिशत) वा यस बीमालेख बापत बीमकलाई भुक्तानी गरिएको बीमा शुल्क (पुरक करार (हरु) बापतको बीमाशुल्क बाहेक) मध्ये जुन बढि हुन्छ सो रकम भुक्तानी दिइनेछ र बीमालेख स्वतः अन्त्य हुनेछ ।’

त्यस्तै, शर्त नं २ मा जोखिम प्रारम्भ हुनु अगावै बीमित बालबालिकाको मृत्यु भएमा बीमितले करार बमोजिम रकम पाउने अर्थात २५ प्रतिशत मात्रै जोखिम बहन हुनेछ र बीमालेख स्वतः अन्त्य हुने उल्लेख छ । बीमा ऐनमा बीमितको जोखिम धारणको लागि बीमा गरिने उल्लेख छ । तर, बीमा ऐन र बीमाको सामान्य सिद्धान्त विपरति सुर्यज्योति लाइफले बीमितकै जोखिम धारणा नगर्ने बीमा पोलिसी बिक्री वितरण गरेर जनतालाई ठगी गरिरहेको हो ।

सो पोलिसीमा बीमित बाहेक बालबालिकाको बीमा गर्न प्रस्ताव गर्ने बीमितका अभिभावकको निधन भएमा भने शतप्रतिशत जोखिम धारण गरिएको छ । बीमितको जोखिम धारण नगर्ने उक्त बीमा पोलिसीले बीमितको प्रस्तावकको भने शतप्रतिशत जोखिम धारण गर्ने सोही पोलिसीको शर्त नं ४ मा उल्लेख छ । त्यस्तै शर्त नं ५ मा बीमित र प्रस्तावकको एकैसाथ निधन भएमा प्रस्तावकको बीमाङ्क रकम शतप्रतिशत र बीमित बालबालिकाको निधन बापत बीमाङ्क रकमको २५ प्रतिशत पाउने उल्लेख छ । सो बीमालेख अनुसार पुरक करार सम्बन्धी लाभ पनि बीमित बालबालिकाले पाउने छैनन्, केवल प्रस्तावकले मात्रै पाउनेछन् ।

बीमितिले बुझ्नै नसक्ने अत्यन्तै साना अक्षर बनाएर बिक्री गरिएको बीमा पोलिसीमा बालबालिकाको बीमा गर्दा झुक्याउने गरिएको एक बीमा अभिकर्ताले स्वीकार गरे । ‘हामीले जोखिम बहन २५ प्रतिशत मात्रै हुन्छ भन्नै सक्दैनौं, तर कम्पनीले दिएको पोलिसी भएकोले बिक्री गरिरहेका छौं, अक्षर साना छन्, सबै हेरेर साध्य छैन, पोलिसी लिएर गएपछि पनि केही भन्न आएका छैनन्’, ति अभिकर्ताले बीमापोष्टसँग भने ।

बीमितको जोखिम रक्षावरण नगर्ने बीमा पोलिसी बिक्री वितरण गरिएको सम्बन्धमा सो कम्पनीका सूचना अधिकारी उमेश मैनालीसँग जिज्ञाशा राख्न खोज्दा सम्पर्कमा आउन चाहेनन् ।